Færeyska karlalandsliðið hefur orðið fyrir verulegu áfalli fyrir umspilsleiki um sæti á HM, þar sem liðið þarf að spila án síns sterkasta leikmanns.

Elias Ellefsen á Skipagøtu leikmaður THW Kiel, sem er talinn besti handknattleiksmaður Færeyinga um þessar mundir, verður ekki með landsliðinu í afar mikilvægum leikjum gegn Bosníu í umspili fyrir heimsmeistaramótið sem fram fara um miðjan næsta mánuð. Hann er enn að glíma við axlarmeiðsli sem hann hlaut skömmu fyrir jól í leik með Kiel í þýsku Bundesligunni og hefur ekki náð sér að fullu.

Þrátt fyrir meiðslin tók Elias þátt í Evrópumótinu í janúar en samkvæmt færeyska miðlinum Portal.fo er útlit fyrir að hann verði einnig frá keppni með Kiel á næstu vikum.

Þjálfararnir, Peter Bredsdorff-Larsen og Hjalti Mohr Jacobsen, hafa valið 16 manna hóp fyrir leikina gegn Bosníu. Þar eru meðal annars tveir leikmenn úr Val, þeir Bjarni í Selvindi og Allan Norðberg, sem fá tækifæri í þessum mikilvægu viðureignum. 

Þrátt fyrir skarðið sem myndast í hópnum stefna Færeyingar enn á að ná sögulegum árangri með því að komast í fyrsta sinn á HM, en verkefnið verður án efa erfiðara án Eliasar.