30.umferðin í þýsku Bundesligunni hélt áfram í kvöld með tveimur leikjum. Rhein-Neckar Löwen vann sannfærandi átta marka sigur gegn Melsungen í Íslendingaslag 30-22.

Staðan í hálfleik var 16-10 eftir að Rhein Neckar Löwen skoruðu sex síðustu mörk fyrri hálfleiksins. Haukur Þrastarson hélt uppteknum hætti frá síðustu leikjum og var markahæstur í liði Ljónanna með átta mörk og gaf fimm stoðsendingar.

Hann skoraði meðal annars fimm mörk á tíu mínútna kafla í leiknum. Í liði Melsungen skoraði Reynir Þór Stefánsson fjögur mörk úr sex skotum og Arnar Freyr Arnarsson skoraði tvö mörk af línunni.

Með sigrinum nálgast Rhein Neckar Löwen, Melsungen í deildinni. Ljónin eru með 33 stig í 8. sæti deildarinnar einungis stigi á eftir Melsungen.

Í hinum leik kvöldsins tapaði Lemgo óvænt gegn botnliði Mindsen 28-32 á heimavelli og þar með hafa botnliðin bæði unnið leiki sína í þessari umferð en Leipzig vann Erlangen í gærkvöldi og kom sér tímabundið af botni deildarinnar. Minden fer hinsvegar upp fyrir Leipzig og Wetzlar með sigrinum og úr fallsæti eftir sigurinn.

Lemgo er hinsvegar áfram í 6.sæti deildarinnar með 36 stig en um var að ræða rándýrt tap liðsins í baráttunni um Evrópudeildarsæti á næstu leiktíð. Niels Versteijnen var markahæstur í liði Lemgo með sjö mörk og Philipp Vorlicek gerði slíkt hið sama fyrir Minden.