Íslenski landsliðsmaðurinn Haukur Þrastarson hefur framlengt samning sinn við þýska handknattleiksfélagið Rhein-Neckar Löwen til ársins 2028. Félagið greindi frá þessu í dag.

Haukur gekk til liðs við Rhein-Neckar Löwen síðasta sumar eftir dvöl hjá Dinamo Bucuresti í Rúmeníu og þar áður hjá pólska stórliðinu Industria Kielce, þar sem hann lék undir stjórn Talants Dujshebaev. Haukur er uppalinn á Selfossi þar sem hann sló í gegn í Olís-deildinni áður en hann fór til Póllands.

Hinn 23 ára gamli leikstjórnandi hefur fest sig í sessi sem einn af lykilmönnum Rhein Neckar Löwen en hann er stoðsendingahæsti leikmaður þýsku Bundesligunnar. Haukur er einnig markahæsti leikmaður liðsins með 190 mörk, einu marki meira en línumaðurinn Jannik Kohlbacher.

Í tilkynningu félagsins kemur fram að stjórnendur Rhein-Neckar Löwen séu afar ánægðir með þróun Hauks og telji hann mikilvægan hluta af framtíðaráformum félagsins næstu árin.

Með framlengingunni er ljóst að Haukur verður áfram í sterkustu deild heims næstu ár.