Auk eftirsóttasta titils evrópsks félagsliðahandbolta fylgja verulegar tekjur því að komast alla leið í úrslitahelgi Meistaradeildarinnar í Köln.

Evrópska handknattleikssambandið, EHF, greiddi alls 750.000 evrur í verðlaunafé til liðanna fjögurra sem tóku þátt í úrslitahelginni í ár.

FC Barcelona, sem varð Evrópumeistari eftir sigur á Füchse Berlin í úrslitaleiknum, fékk 300.000 evrur fyrir titilinn. Berlin fékk 225.000 evrur fyrir annað sætið, á meðan SC Magdeburg og Aalborg Håndbold hlutu 150.000 og 75.000 evrur fyrir þriðja og fjórða sætið.

Verðlaunaféð í Köln er þó aðeins hluti af tekjum liðanna úr keppninni. EHF greiðir einnig þátttökubónusa og árangurstengdar greiðslur allt tímabilið.

Hvert lið fær 10.000 evrur fyrir hvern leik sem það spilar í keppninni. Auk þess bætast við 5.000 evrur í árangurstengdar greiðslur og 20.000 evra aukabónus fyrir tvö efstu lið milliriðlanna.

Barcelona hafði þegar tryggt sér 338.000 evrur í verðlaunafé áður en úrslitahelgin hófst. Með 300.000 evra sigurlaununum í Köln námu heildartekjur félagsins úr Meistaradeildinni því 638.000 evrum á tímabilinu eða rúmlega 92 milljónum íslenskra króna.

SC Magdeburg hafði sömuleiðis safnað umtalsverðum tekjum áður en liðið kom til Kölnar og hafði þegar tryggt sér 323.000 evrur í verðlaunafé áður en úrslitahelgin hófst.

Þrátt fyrir að þessar upphæðir séu smávægilegar miðað við fjárhagsumsvif stærstu knattspyrnufélaga Evrópu eru þær engu að síður kærkomin viðbót fyrir handboltafélögin.

Hér að neðan má sjá hvað félögin í Meistaradeild Evrópu fengu fyrir þátttöku sína í keppninni:

1. Barça – 638.000 euro
2. Füchse Berlin – 529.000 euro
3. SC Magdeburg – 473.000 euro
4. Aalborg Håndbold – 381.000 euro
5. One Veszprem – 282.000 euro
6. HBC Nantes – 272.000 euro
7. Sporting CP – 269.000 euro
8. Orlen Wisla Plock – 262.000 euro
9. OTP Bank Pick Szeged – 253.000 euro
10. Industria Kielce – 251.000 euro
11. Paris Saint-Germain – 231.000 euro
12. GOG – 225.000 euro
13. HC Eurofarm Pelister – 170.000 euro
14. Dinamo Bucuresti – 160.000 euro
15. Kolstad Handball – 160.000 euro
16. HC Zagreb – 150.000 euro