Leikmenn Füchse Berlin hafa notið verðskuldaðs frís í Barcelona eftir annasamt tímabil og var það framkvæmdastjóri félagsins, Bob Hanning, sem fór fyrir hópnum.

Í ferðinni voru meðal annars ungu leikmennirnir Tim Freihöfer, Lasse Ludwig og Maxim Orlov, sem eyddu dögunum í að kanna strandlífið, versluðu og fóru á veitingastaði í katalónsku borginni.

Einn af hápunktum ferðarinnar var kvöldstund með Dika Mem, stórstjörnu Barcelona, sem mun ganga til liðs við Füchse Berlin árið 2027. Frakkinn bauð hópnum út á lífið í Barcelona og tók á móti verðandi liðsfélögum sínum.

Bob Hanning hrósaði Mem fyrir móttökurnar og sagði hann hafa reynst frábær gestgjafi. Þá hafi Frakkinn einnig lýst mikilli eftirvæntingu fyrir komandi árum og þátttöku sinni með Berlínarliðinu í Meistaradeild Evrópu.

Ferðin til Barcelona er hluti af hefð sem hefur skapast hjá Füchse Berlin. Félagið hefur á undanförnum árum farið í sambærilegar ferðir að loknu tímabili, meðal annars til Marbella og Maldíveyja.