Talant Dujshebaev hefur verið á allra stærsta sviði evrópsks handbolta í áratugi og hefur sterkar skoðanir á þýsku Bundesligunni. Hann segir deildina vera þá bestu í heimi og líkir henni við NBA-deildina í körfubolta.

Dujshebaev var staddur í Þýskalandi til að fylgjast með sonum sínum, Alex Dujshebaev og Daniel Dujshebaev, mætast þegar Gummersbach og Melsungen áttust við fyrr í mánuðnum.

Eftir leikinn var Dujshebaev spurður í þýsku sjónvarpi hvernig það væri að sjá báða syni sína spila í efstu deild Þýskalands. Svarið þróaðist fljótt yfir í mikið lof um Bundesliguna.

„Ég er mjög ánægður með að þeir fái að spila í bestu deild í heimi,“ sagði Dujshebaev samkvæmt Handnews.

„Þetta er eins og NBA, nema fyrir handbolta.“

Dujshebaev þekkir vel til þýska handboltans eftir langan og farsælan feril. Hann lék sjálfur í Þýskalandi með Nettelstedt-Lübbecke og Minden áður en hann varð einn sigursælasti maður evrópsks handbolta, bæði sem leikmaður og síðar þjálfari.

Að hans mati er það stór áfangi fyrir handboltamenn að komast í Bundesliguna og hann hvetur unga leikmenn til að horfa til Þýskalands þegar þeir taka næstu skref á ferlinum.

„Ég segi alltaf að ég hafi verið ótrúlega heppinn í lífinu. Ég fékk sjálfur að spila í bestu deild í heimi,“ sagði Dujshebaev.

„Ég segi mörgum ungum leikmönnum að þeir ættu seinna meir að reyna að komast til Þýskalands og spila í Bundesligunni. Satt best að segja er þetta allt annar heimur.“