Magdeburg valtaði yfir Hamburg – Gidsel bjargaði Berlín
ANGELIKA WARMUTH / AFP

Fjórir leikir fóru fram í þýsku Bundesligunni í dag. Topplið Magdeburg vann stórsigur á Hamburg, Füchse Berlin slapp með skrekkinn gegn Göppingen og bæði Flensburg og Kiel fögnuðu öruggum sigrum í 13. umferð deildarinnar.

SC Magdeburg heldur áfram að sýna styrk sinn í þýsku úrvalsdeildinni en liðið vann sannfærandi ellefu marka útisigur á Hamburg, 33-22, eftir að hafa leitt 16-8 í hálfleik. Magdeburg tók strax öll völd á vellinum og komst í 5-1 áður en heimamenn náðu að svara fyrir sig. Yfirburðir gestanna voru miklir og á tímabili í síðari hálfleik munaði fimmtán mörkum á liðunum.

Sænski landsliðsmaðurinn Albin Lagergren var markahæstur Magdeburg með tíu mörk en liðið lék án íslenska landsliðsmannsins Ómars Inga Magnússonar sem glímir við meiðsli. Markvörðurinn Matej Mandić átti sömuleiðis stórleik og hafði meðal annars varið ellefu skot í fyrri hálfleik. Þetta var tólfti sigur Magdeburg í deildinni á tímabilinu.

Füchse Berlin þurfti hins vegar að hafa verulega fyrir sínum tveimur stigum þegar liðið heimsótti Göppingen. Berlínarliðið hafði að lokum betur, 32-31, eftir að hafa leitt 17-14 í hálfleik. Gestirnir komust mest fimm mörkum yfir í fyrri hálfleik en Göppingen vann sig inn í leikinn og komst yfir í fyrsta sinn, 29-28, þegar sjö mínútur voru eftir.

Daninn Mathias Gidsel reyndist enn á ný lykilmaður Berlínarliðsins og skoraði þrettán mörk úr sautján skotum. Füchse Berlin komst í 32-30 undir lokin en Göppingen fékk tækifæri til að jafna metin í lokasókninni. Frank Lastro skaut hins vegar yfir markið og gestirnir fögnuðu naumum sigri.

THW Kiel átti ekki í teljandi vandræðum með botnlið HSG Wetzlar og vann níu marka heimasigur, 31-22. Staðan var 15-8 í hálfleik og var þýski landsliðsmarkvörðurinn Andreas Wolff maður leiksins með 21 varið skot. Domen Makuc var markahæstur Kiel með sjö mörk. Kiel heldur þar með áfram að veita Magdeburg harða keppni á toppi deildarinnar. 

Flensburg-Handewitt vann einnig öruggan sigur þegar Rhein-Neckar Löwen kom í heimsókn. Lokatölur urðu 40-33 eftir að Flensburg hafði leitt 19-14 í hálfleik. Sóknarleikur heimamanna var öflugur og skoraði liðið 21 mark í síðari hálfleik. Flensburg heldur því áfram að blanda sér í toppbaráttuna. 

Íslendingarnir létu einnig til sín taka í viðureign Flensburg og Rhein-Neckar Löwen. Arnar Freyr Arnarsson skoraði þrjú mörk fyrir Flensburg á meðan Haukur Þrastarson skoraði sex mörk úr níu skotum fyrir Rhein-Neckar Löwen og gaf tvær stoðsendingar. Frakkinn Aymeric Minne var atkvæðamestur heimamanna með tólf mörk úr þrettán skotum en Emil Jakobsen bætti við níu mörkum. Flensburg hefur nú unnið alla sjö heimaleiki sína í deildinni á tímabilinu. 

Úrslit dagsins:

Göppingen – Füchse Berlin 31-32
Flensburg – Rhein-Neckar Löwen 40-33
Hamburg – Magdeburg 22-33
Kiel – Wetzlar 31-22

Nýjustu fréttir

HAFA SAMBAND

Handkastið.net

Handkastið er hlaðvarpsþáttur og fréttamiðill um íslenskan og erlendan handbolta.

Ritstjórar eru Arnar Daði Arnarsson og Styrmir Sigurðsson.


handkastid@handkastid.net

Scroll to Top