Víkingur situr á botni Olís-deildar karla án stiga eftir tap gegn FH í 3. umferð deildarinnar á miðvikudagskvöld. Tapið var það sjöunda í röð hjá Víkingum í efstu deild og það þriðja á þessu tímabili.

FH vann leik liðanna í Kaplakrika, 40–34, en frammistaða Víkings og erfið staða liðsins voru meðal þess sem rætt var um í nýjasta þætti Handkastsins.

Víkingur hefur tapað öllum þremur leikjum sínum á tímabilinu og situr ásamt HK á botni deildarinnar án stiga. Liðið hefur jafnframt tapað sjö síðustu leikjum sínum í Olís-deildinni en Víkingur tapaði fjórum síðustu leikjum sínum í Olís-deildinni tímabilið 2023/2024.

Ellefu sigrar í 96 leikjum

Víkingum hefur gengið illa þau tímabil sem félagið hefur leikið í efstu deild undanfarinn rúman áratug.

Liðið vann fimm af 22 leikjum tímabilið 2023/24, einn af 22 tímabilið 2021/22 og einn af 22 tímabilið 2017/18. Tímabilið 2015/16 vann Víkingur fjóra af 27 leikjum sínum.

Þegar fyrstu þrír leikir yfirstandandi tímabils eru teknir með hefur Víkingur því aðeins unnið ellefu af síðustu 96 leikjum sínum í efstu deild.

• 2026/27: Enginn sigur í þremur leikjum
• 2023/24: Fimm sigrar í 22 leikjum
• 2021/22: Einn sigur í 22 leikjum
• 2017/18: Einn sigur í 22 leikjum
• 2015/16: Fjórir sigrar í 27 leikjum

Mikilvægur leikur gegn Þór

Næsta verkefni Víkings er heimaleikur gegn Þór í Virkinu í 4. umferðinni á föstudagskvöld. Að honum loknum bíða erfiðir leikir gegn Haukum og Val.

Aðalsteinn Eyjólfsson og lærisveinar hans þurfa því nauðsynlega á góðum úrslitum að halda gegn Þór áður en þeir mæta tveimur af sterkari liðum deildarinnar.