Óvissa ríkir um þátttöku Dags Leós Fannarssonar og Bjarna í Selvindi þegar Valur tekur á móti danska liðinu Mors-Thy í 1. umferð Evrópudeildarinnar annað kvöld.

Leikurinn fer fram í Valsheimilinu og hefst klukkan 18:45.

Dagur Leó og Bjarni voru báðir fjarri góðu gamni þegar Valur tapaði gegn KA í síðustu umferð Olís-deildarinnar. Dagur Leó sneri sig illa á ökkla á æfingu Vals í síðustu viku á meðan Bjarni hefur verið að glíma við meiðsli aftan í læri.

Ágúst Jóhannsson, þjálfari Vals, segir í samtali við Handkastið að staðan á þeim verði metin eftir æfingu liðsins í kvöld.

„Bjarni æfði aðeins í gær með liðinu og verður prófaður aftur í dag. Dagur Leó gat ekki æft í gær en við ætlum að prófa hann aftur í dag. Staðan á þeim verður tekin eftir æfingu kvöldsins. Það er ekki hægt að segja neitt til um það eins og staðan er,“ sagði Ágúst.

Hann telur líkurnar á því að þeir geti tekið þátt í leiknum gegn Mors-Thy vera jafnar.

„Ég myndi meta það þannig að það væri 50/50 að þeir verði með en það kemur í ljós í kvöld.“

Valsmenn þurfa þó að taka endanlega ákvörðun fljótlega enda þarf félagið að skila inn leikmannalista fyrir leikinn í hádeginu á morgun. Valur hefur því fram á kvöld til að meta stöðuna á þeim Degi Leó og Bjarna áður en kemur í ljós hvort þeir verði klárir í fyrsta leik liðsins í Evrópudeildinni.