Hægri hornamaðurinn Andri Freyr Friðriksson er búinn að vera á láni hjá KA frá Aftureldingu í rúman mánuð.

Andri Freyr sem er fæddur árið 2007, hefur komist nokkuð vel frá sínu í fyrstu leikjum tímabilsins með KA. Hefur hann skorað 11 mörk í 5 leikjum úr 15 skotum.

Andri Freyr byrjaði frekar seint að æfa handbolta en hann var 14 ára gamall þegar hann mætti á sína fyrstu æfingu. Hann var áður í körfubolta en eftir fyrstu æfinguna í handbolta var ekki aftur snúið.

Við heyrðum í Andra Frey og fengum að vita hvað kom til að hann endaði á láni hjá KA, veruna fyrir norðan og fleira til.

"Aðdragandinn af þessu var í raun mjög stuttur. Hrannar Guðmunds talaði við mig fyrst og sagði að KA hefði haft samband þar sem að þeim vantaði leikmann vegna meiðslanna hjá Giorgi. Eftir það var ég í samtali við bæði Andra Snæ og Jón Heiðar formann í 3-4 daga og flutti síðan á Akureyri viku eftir að Hrannar talaði fyrst við mig. Ég átti líka samtöl við bæði Stebba Árna og Árna Braga sem sögðu báðir að ég ætti að stökkva á þetta tækifæri þar sem þetta myndi hjálpa mér mikið að öðlast reynslu í efstu deild"

"Fyrsti mánuðurinn hérna fyrir norðan hefur gengið mjög vel, mér hefur verið tekið mjög vel af öllum innan KA og mér líst bara mjög vel á allt hérna. Það hefur verið virkilega gaman að spila fyrir KA og mig hlakkar bara mikið til að takast á við það sem er framundan hjá liðinu"

"Það verður mjög gaman að spila á móti Aftureldingu í KA heimilinu þann 22. okt og eins og ég skil þetta þá er sem betur fer ekkert þannig ákvæði í lánssamningnum að ég megi ekki spila þann leik. Lánssamningurinn gildir fram að jólum svo að öllu óbreyttu flyt ég aftur suður þegar deildin fer í jólafrí. En ég er klárlega opinn fyrir því að vera áfram á Akureyri ef að KA og Aftureldingu komast að samkomulagi um það enda líður mér mjög vel í KA og að búa hér á Akureyri" sagði þessi lunkni og efnilegi hornamaður að lokum.