Danska liðið Mors-Thy vann sögulegan sigur í gær þegar það lagði ungverska liðið Tatabanya, 35–33, á heimavelli í annarri umferð Evrópudeildarinnar.

Þetta var fyrsti sigur félagsins í riðlakeppni í Evrópukeppni, að því er handboltasérfræðingurinn Bent Nyegaard greinir frá hjá TV 2 Sport.

Mors-Thy tapaði fyrir Val á Hlíðarenda í fyrstu umferð með 13 markamun en náði sér á strik gegn Tatabanya og er nú með tvö stig líkt og Valur. Ungverska liðið er enn án stiga og heimsækir Val í næstu umferð.

Anton Houe skoraði sjö mörk fyrir Mors-Thy, Simon Skovhus bætti við sex og Mads Peter Lønborg skoraði fimm.