Það var mikil dramatík í bikarleik HSV Hamburg og þýska B-deildarfélagsins HC Elbflorenz í vikunni í 32-liða úrslitum þýska bikarsins. Landsliðsmaðurinn Einar Þorsteinn Ólafsson leikur með Hamburg.

Búast mátti við öruggum sigri Hamburg í leiknum en annað kom á daginn. Þýska B-deildarliðið vann eftir tvíframlengdan leik 47-46 þar sem sigurmarkið kom á lokasekúndum leiksins.

Elbflorenz komust í fyrsta skipti yfir í leiknum í seinni hálfleik í stöðunni 18-17 en liðin skiptust á að vera með forskotið. Staðan eftir venjulegan leiktíma var 35-35. Elbflorenz voru með undirtökin í báðum framlengingunum og unnu að lokum dramatískan eins marks sigur.

Mikil vonbrigði fyrir Hamburg en liðið er í 11.sæti þýsku úrvalsdeildarinnar með fimm stig að loknum sex umferðum. Hamburg mætir Magdeburg í 7.umferðinni í dag og þurfa að eiga töluvert betri leik ætli þeir sér að sækja stigin úr þeim leik að mati danska leikmannsins, Jacob Lassen sem var ekkert að skafa af því í viðtali við Dyn eftir leikinn gegn Elbflorenz.

„Vörnin okkar var alltof léleg í dag. Ef við spilum svona gegn Magdeburg á sunnudaginn munum við tapa með 20 mörkum,“ sagði mjög reiður Jacob Lassen við þýsku streymisveituna Dyn eftir leikinn.