Alþjóðahandknattleikssambandið, IHF tilkynnti í dag að danski landsliðsmaðurinn, Mathias Gidsel hafi verið kjörinn besti handknattleiksmaður heims árið 2025. Þá var hin norska Henny Reistad kjörin besta handknattleikskona heims árið 2025.

Er þetta þriðja árið í röð sem Gidsel og Reistad hljóta nafnbótina. Engum leikmanni hvorki í karla eða kvennaflokki hafði áður tekist að vinna til verðlaunanna þrjú ár í röð.

Portúgalinn Francisco Costa var kjörinn besti ungi handknattleiksmaður heims árið 2025. Francisco Cota er einnig að brjóta blað í sögunni en hann er fyrsti Portúgalinn sem hlotnast þessi heiður að vera kjörinn besti ungi handknattleiksmaður heims.

Hin þýska Viola Leuchter var þá kjörin besta unga handknattleikskona heims árið 2025. Er þetta í fyrsta sinn sem hún vinnur til verðlaunanna. Viola Leuchter sem er fædd árið 2004 gekk í raðir Odense í Danmörku í sumar eftir að lið hennar í Þýskalandi, Ludwigsburg fór á hausinn.