Guðrún Antonía Jóhannsdóttir hefur samið við uppeldisfélag sitt HK og gerir tveggja ára samning við félagið. HK tilkynnti þetta á samfélagsmiðlum í vikunni.

Guðrún Antonía sem er fædd árið 2008 leikur sem línumaður og hefur verið hluti af gríðarlega sterkum árgangi í yngri flokkum HK. Hún bíður nú þess að leika sína fyrstu leiki í Olís-deild kvenna en HK eru nýliðar í Olís-deildinni á næstu leiktíð eftir að hafa unnið Grill66-deildina.

,,Guðrún hefur á liðnu tímabili sýnt miklar framfarir og bindur HK miklar vonir við hana á komandi árum," segir í tilkynningunni frá HK. Það verður gaman að fylgjast með Guðrúnu í Olís-deildinni í vetur.

Dagur Snær Steingrímsson er nýráðinn þjálfari HK og tekur við liðinu af Hilmari Guðlaugssyni. HK hefur að skipa gríðarlega öflugum hópi leikmanna sem flestar eru uppaldar hjá félaginu.