FC Barcelona varð spænskur bikarmeistari í handbolta í 13. sinn í röð og í 30. sinn alls eftir stórsigur, 37-17, á Bidasoa Irún í úrslitaleik Copa del Rey.

Katalónska stórliðið gaf tóninn strax frá fyrstu mínútu og gerði í raun út um leikinn á örfáum mínútum. Barcelona skoraði fyrstu sjö mörkin og komst í 7-0 áður en Bidasoa náði að svara fyrir sig. Baskaliðið náði aldrei að vinna sig inn í leikinn eftir það.

Stærsta stjarna úrslitaleiksins var danski markvörðurinn Emil Nielsen, sem átti stórkostlega frammistöðu í sínum síðasta leik á spænskri grundu áður en hann flytur til Veszprém eftir tímabilið. Nielsen varði 18 skot og endaði leikinn með 50 prósenta markvörslu.

Carlos Ortega, þjálfari Barcelona, hrósaði liðinu eftir leik og sagði varnarleikinn hafa verið nánast fullkominn.

Nielsen yfirgaf völlinn á 43. mínútu þegar staðan var orðin 28-14 og fékk mikið lófatak frá áhorfendum í Alicante. Þá fékk Viktor Gísli Hallgrímsson tækifæri til að spila síðustu mínútur leiksins fyrir lokaátökin í Meistaradeild Evrópu um næstu helgi.

Íslenski landsliðsmarkvörðurinn stóð einnig fyrir sínu. Hann fékk aðeins á sig þrjú mörk á þeim 17 mínútum sem hann lék og varði sjö skot, sem skilaði honum 58 prósenta markvörslu.

Barcelona hélt einbeitingunni út allan leikinn þrátt fyrir að sigurinn væri nánast tryggður frá fyrstu mínútum. Niðurstaðan varð stærsti sigur í sögu bikarúrslitaleiksins, 20 marka sigur á Bidasoa.

Þrátt fyrir erfiðan úrslitaleik hafði Bidasoa þegar náð sínu helsta markmiði í keppninni. Með því að komast í úrslitaleikinn tryggði félagið sér þátttökurétt í Evrópudeildinni á næsta tímabili.

Barcelona heldur nú til Kölnar þar sem liðið mætir Aalborg í undanúrslitum Meistaradeildar Evrópu um næstu helgi.