Króatíska stórliðið RK Zagreb hefur ráðið Hrvoje Horvat sem nýjan aðalþjálfara félagsins.

Horvat kemur til félagsins frá svissneska liðinu Kadetten Schaffhausen þar sem hann stýrði meðal annars íslenska landsliðsmanninum Óðni Þór Ríkharðssyni. Kadetten tókst ekki að verja svissneska meistaratitilinn á síðustu leiktíð en liðið tapaði 3-0 í úrslitaeinvíginu gegn HC Kriens-Luzern.

Fyrir Horvat er þetta heimkoma en hann lék um árabil með RK Zagreb og hefur jafnframt stýrt króatíska landsliðinu.

Handboltasérfræðingurinn Rasmus Boysen benti á það á Facebook-síðu sinni, Rasmus Boysen #Handball, að félagið hafi skipt afar ört um þjálfara á síðustu árum.

Meðal þeirra sem hafa stýrt Zagreb á undanförnum árum eru Ivica Obrvan, Andrija Nikolić, Slavko Goluža, Vlado Šola, Velimir Petković og Boris Dvoršek, auk þess sem nokkrir þeirra hafa tekið við liðinu oftar en einu sinni. Tíð þjálfaraskipti hafa því verið áberandi hjá króatíska stórveldinu og verður fróðlegt að sjá hvort Horvat nái að skapa meiri stöðugleika á bekknum.

Horvat tekur við liði sem hefur verið allsráðandi í króatískum handknattleik um árabil en hefur átt erfitt uppdráttar í Meistaradeild Evrópu á síðustu leiktíðum. Vonast forráðamenn félagsins til að ráðning hans marki upphaf nýs kafla hjá RK Zagreb.

Þjálfarar RK Zagreb frá árinu 2014:

2014-2016: V. Vujović
2016: A. Nikolić (tímabundið)
2016-2017: S. Ivandija
2017: S. Goluža (tímabundið)
2017: K. Kamenica
2017-2018: Z. Saračević
2018: L. Červar
2019: B. Tamše
2019-2020: V. Vujović
2020: I. Vori
2020-2021: V. Šola
2021-2022: I. Orbvan
2022: T. Valčić/Špoljarić (tímabundið)
2022-2023: S. Goluža
2023-2024: A. Nikolić
2024-2025: V. Petkovic
2025: A. Nikolić
2025-2026: N. Šoštarić
2026-?: H. Horvát