Bennet Wiegert hefur gert SC Magdeburg að einu öflugasta félagsliði heims en útilokar ekki að taka einn daginn við þýska landsliðinu. Hann fagnar þó því að Alfreð Gíslason hafi framlengt samning sinn við Þjóðverja til ársins 2028.

Wiegert hefur verið lykilmaður í velgengni Magdeburg undanfarin ár, bæði sem þjálfari og íþróttastjóri. Í vodcastinu Kretzsche & Schmiso hjá Dyn var hinn 44 ára gamli Wiegert spurður hvort hann gæti séð sjálfan sig sem landsliðsþjálfara Þýskalands í framtíðinni.

„Það er heillandi og krefjandi,“ sagði Wiegert um starfið.

Hann bendir þó á að margt þurfi að falla saman svo slíkt geti orðið að veruleika.

„Spurningin er hvort það gangi einhvern tímann upp. Verður tímasetningin rétt? Passa samningarnir? Verður starfið þá laust í Þýskalandi? Eins og staðan er núna sé ég ekkert laust starf – og það er ekki bara vegna sambands míns við Alfreð.“

Alfreð Gíslason framlengdi í lok maí samning sinn við þýska handknattleikssambandið og gildir nýi samningurinn fram yfir Ólympíuleikana árið 2028.

Wiegert segist hafa verið „mjög létt“ þegar hann las fréttirnar af framlengingunni.

Hann vill alls ekki sjá umræðu um framtíð landsliðsþjálfarans fara af stað fyrir HM á heimavelli árið 2027 og vonast til þess að nýi samningurinn skapi ró í kringum landsliðið næsta árið eða tvö.

Eftir það verði einfaldlega að koma í ljós hvað gerist.

Nákvæm samningslengd Wiegert hjá Magdeburg hefur ekki verið gerð opinber og hann tók jafnframt á orðrómi þess efnis að samningur hans við félagið væri ótímabundinn.

„Það gæti reynst erfitt að láta tímasetninguna passa fyrir báða aðila,“ sagði Wiegert um möguleikann á landsliðsstarfinu.

„Það eru samningar. Þótt við ræðum ekki samningslengdir stjórnenda hjá Magdeburg þá eru þeir með samninga.“

Hann tók síðan af allan vafa um að hann væri með ótímabundinn samning hjá þýsku meisturunum.

„Þeir eru ekki ótímabundnir. Það er alltaf talað og getið sér til um það, en þannig er það ekki. Slíkt er ekki til í afreksíþróttum.“