Hinn reynslumikli Veselin Vujović er hættur sem þjálfari karlalandsliðs Katar eftir að samningaviðræður hans við sambandið runnu út í sandinn. Vujović staðfesti tíðindin í samtali við Balkan-Handball en hann stýrði Katar nýverið til silfurverðlauna á Asíuleikunum.

Þjálfarinn segir að samningstilboðið sem honum barst eftir árangurinn hafi ekki verið í samræmi við væntingar hans.

Vujović vildi fá samning fram yfir heimsmeistaramótið í janúar og fram að undankeppni Ólympíuleikanna í Los Angeles. Forráðamenn Katar buðu honum hins vegar aðeins samning út heimsmeistaramótið.

„Ég fékk ekki sanngjarnt tilboð eftir að hafa unnið til verðlauna á Asíuleikunum,“ sagði Vujović í samtali við Balkan-Handball.

Hann benti jafnframt á að Katar væri í afar erfiðum riðli á heimsmeistaramótinu í janúar þar sem liðið mætir Svíþjóð, Noregi og Grikklandi.

Vujović sagðist telja betra að hætta núna en að láta af störfum eftir þrjú töp á heimsmeistaramótinu.

Þjálfarinn hefur víða komið við á löngum ferli og meðal annars stýrt landsliðum Slóveníu, Norður-Makedóníu, Írans og Katar. Hann náði eftirminnilegum árangri með Slóveníu þegar liðið vann bronsverðlaun á heimsmeistaramótinu árið 2017.

Ekki hefur verið tilkynnt hver tekur við landsliði Katar en heimsmeistaramótið hefst eftir tæpa þrjá mánuði.