Afturelding hafði betur gegn HK, 30-26, í 6. umferð Olís-deildar karla í handbolta í kvöld. Staðan var jöfn í hálfleik, 16-16, en Mosfellingar voru sterkari í síðari hálfleik þar sem Einar Baldvin Baldvinsson fór á kostum í marki liðsins.

Leikurinn var jafn og spennandi í fyrri hálfleik. HK náði tveggja marka forskoti í stöðunni 4-6 en Afturelding svaraði fyrir sig og komst meðal annars í 14-12.

HK skoraði þrjú mörk í röð og komst yfir, 14-15, undir lok fyrri hálfleiks en liðin gengu jöfn til búningsherbergja, 16-16. Afturelding byrjaði síðari hálfleikinn betur og náði þriggja marka forskoti í stöðunni 19-16. HK tókst að jafna metin í 19-19 en þá tóku heimamenn aftur frumkvæðið.

Mosfellingar náðu fjögurra marka forskoti, 23-19, og héldu HK-ingum í hæfilegri fjarlægð næstu mínúturnar. Þegar rúmar tíu mínútur voru eftir var staðan 25-22. Afturelding jók forskotið í fimm mörk, 27-22, en HK minnkaði muninn í þrjú mörk, 27-24. Lengra komust gestirnir ekki og Afturelding sigldi að lokum fjögurra marka sigri, 30-26.

Einar Baldvin Baldvinsson átti stórleik í marki Aftureldingar og varði 17 skot. Hákon Daði Styrmisson og Oscar Sven Leithoff Lykke voru markahæstir heimamanna með sjö mörk hvor en Ævar Smári Gunnarsson skoraði sex.

Hjá HK var Gunnar Dan Hlynsson markahæstur með sjö mörk, Örn Alexandersson skoraði sex og Leó Snær Pétursson fjögur.

Markverðir HK, Patrekur Guðni Þorbergsson og Brynjar Vignir Sigurjónsson, vörðu samtals tíu skot.