Úkraínska stórskyttan Dmytro Horiha, leikmaður ungverska liðsins Pick Szeged, hefur fengið heimild til að leika með landsliði Norður-Makedóníu í handbolta.

Horiha hefur áður leikið með úkraínska landsliðinu en verður nú gjaldgengur með Norður-Makedóníu þegar undankeppni Evrópumótsins 2028 hefst í nóvember.

Aleksandar Stefanov, formaður handknattleikssambands Norður-Makedóníu, staðfesti tíðindin á blaðamannafundi í dag.

Horiha hefur þegar fengið makedónskan ríkisborgararétt en þurfti að uppfylla tilskilinn biðtíma samkvæmt reglum Alþjóðahandknattleikssambandsins (IHF) áður en hann gæti skipt um landslið. Nú hefur hann fengið allar nauðsynlegar heimildir.

Horiha, sem leikur í stöðu vinstri skyttu, hefur leikið yfir 20 landsleiki fyrir Úkraínu og skorað um 60 mörk. Hann var meðal annars í úkraínska landsliðinu á Evrópumótinu árið 2020.

Hann þekkir vel til handboltans í Norður-Makedóníu eftir að hafa leikið með stórliðinu Vardar áður en hann gekk til liðs við Pick Szeged í Ungverjalandi.

Kiril Lazarov, landsliðsþjálfari Norður-Makedóníu, fagnar liðsstyrknum og telur Horiha geta bætt miklu við liðið.

Lazarov benti á að Horiha hefði verið einn af lykilmönnum Vardar og staðið sig vel eftir félagaskiptin til Ungverjalands. Hann hrósaði sérstaklega öflugu langskoti hans, hæfileikanum til að leika bæði í vörn og sókn og sigurvilja hans.

Norður-Makedónía er í riðli með Svíþjóð, Grikklandi og Lúxemborg í undankeppni EM 2028. Fyrsti leikur liðsins fer fram gegn Lúxemborg 4. nóvember áður en liðið heimsækir Grikkland fjórum dögum síðar.