Það ræðst í kvöld hvort Stjarnan eða Grótta leika í Olís-deild kvenna á næstu leiktíð en liðin mætast í oddaleik í úrslitaeinvígi umspils um sæti í Olís deild kvenna í kvöld klukkan 19:30 í Heklu-höllinni í Garðabæ.

Allir fjórir leikirnir hingað til hafa unnist á útivelli og gríðarlegar sveiflur verið í leikjunum og því er ómögulegt að spá fyrir um hvernig oddaleikurinn spilast í kvöld.

Við heyrðum aðeins í Katrínu Helgu Sigurbergsdóttur fyrirliða Gróttu og fengum hana aðeins til að segja okkur frá einvíginu hingað til og hvernig hún lítur á oddaleikinn í kvöld.

,,Einvígið er búið að vera hrikalega spennandi og skemmtilegt hingað til en hefur verið mjög sveiflukennt eins og úrslitin gefa til kynna. En við hlökkum mikið til að mæta í Garðabæinn í kvöld og sýna okkar rétta andlit og skilja allt eftir inni á vellinum. Að lokum vil ég hvetja allt Gróttufólk og aðra handboltaáhugamenn að fjölmenna og gera Stjörnuheimilið Gróttublátt eins og það hefur verið hingað til," sagði Katrín Helga Sigurbergsdóttir fyrirliða Gróttu.