Fyrirliði kvennaliðs Stjörnunnar undanfarin ár, Eva Björk Davíðsdóttir verður ekki áfram í Garðabænum. Þetta tilkynnti hún í færslu á Instagram síðu sinni í gærkvöldi.

Samkvæmt áreiðanlegum heimildum Handkastsins er Eva Björk á leið heim í uppeldisfélag sitt Gróttu sem verða nýliðar í Grill66-deildinni en Stjarnan hafði betur gegn Gróttu í umspilinu um laust sæti í Olís-deildinni. En eftir að ákveðið var að fjölga í Olís-deildinni úr átta liðum í tíu lið þá fékk Grótta og Víkingur sæti í Olís-deildinni.

Eva Björk hefur leikið með Stjörnunni undanfarin sex ár eftir að hafa leikið með Ajax í Danmörku, Skuru IK í Svíþjóð og Sola Handball í Noregi.

Eva Björk hóf meistaraflokksferil sinn hjá Gróttu og varð til að mynda Íslands­meist­ari með liðinu 2015 og 2016 auk þess að verða bikar­meist­ari árið 2015.

,,6 tímabilum lokið í Stjörnubláu. Þakklát fyrir þennan tíma þar sem skiptust á skin og skúrir, hlátur og grátur. Það eru svo mikil forréttindi að fá að vera hluti af svona hópi - takk öll sem eitt! Nú er komið að næsta kafla og nýjum ævintýrum sem ég er spennt að takast á við," skrifaði Eva Björk á Instagram síðu sinni.

Eva er fimmti leikmaðurinn sem yfirgefur Stjörnuna eftir tímabilið en áður hefur verið tilkynnt að Hanna Guðrún Hauksdóttir hafi skipt yfir í Fram, Rakel Dóróthea Ágústsdóttir í Aftureldingu og þá fóru þær Hrafnhildur Anna Þorleifsdóttir og Guðmunda Auður Guðjónsdóttir í Hauka. Þá hefur einnig verið greint frá því að bæði Sara Katrín Gunnarsdóttir og Natasja Hammer eru óléttar og missa af byrjun tímabilsins hjá Stjörnunni.

View this post on Instagram

A post shared by Eva Björk Davíðsdóttir (@evabjorkdavids)