Stelpurnar í U16 ára landsliði Íslands fóru illa að ráði sínu á loka mínútunum í leik sínum gegn Færeyjum í morgun á Opna Evrópumótinu sem fer fram í Gautaborg.

Íslensku stelpurnar byrjuðu leikinn af krafti og komust í 2-0 og héldu forystunni í leiknum nær allan leikinn. Ísland var einu marki yfir í hálfleik, 7-6 en Kristín Einarsdóttir fór mikinn í sóknarleik Íslands og skoraði fjögur mörk í fyrri hálfleik.

Íslensku stelpurnar hófu seinni hálfleikinn af krafti og komust í 15-9 eftir að Elma Kolbrún Bjarnadóttir hafði komið Íslandi í sex marka forystu.

En þá fór allt í baklás hjá íslenska liðinu og nýttu færeysku stelpurnar sér það og náðu á einhvern ótrúlegan hátt að jafna leikinn og lokatölur 15-15. 

Þessi úrslit reyndust mikilvæg fyrir færeyska liðið sem dugði jafntefli til að vera fyrir ofan Ísland í riðlinum. Það skýrist síðar í dag hverjum íslenska liðið mætir í lokaleik sínum á mótinu.

Markaskorar Íslands: Kristín Einarsdóttir 6, Elma Kolbrún Bjarnadóttir 3, Þórhildur Káradóttir 2, Emilía Guðný Magnúsdóttir 2, Matthildur Helga Ólafsdóttir 1, Sara Sigurvinsdóttir 1.