Línumaðurinn efnilegi, Klara Káradóttir hefur skrifað undir nýjan tveggja ára samning við ÍBV og leikur því áfram með félaginu næstu tvö árin í það minnsta.

Klara lék síðasta vetur í liði 3.flokks ÍBV sem varð bikarmeistari ásamt því að vera hluti af meistaraflokki félagsins sem fór alla leið í úrslit Íslandsmótsins en tapaði gegn Val í úrslitaeinvíginu.

Klara hefur verið fastamaður í yngri landsliðum Íslands undanfarin ár og lék nú síðast tvo vináttuleiki með U18 ára landsliðinu gegn Póllandi fyrr í júlí.

,,Við erum afar ánægð með að hafa Klöru áfram í herbúðum ÍBV og hlökkum til áframhaldandi samstarfs," segir í tilkynningunni frá ÍBV en Klara er dóttir línumannsins, Kára Kristjáns Kristjánssonar.