Undirbúningur liðanna fyrir komandi tímabil er kominn á fullt skrið en þrír æfingaleikir fóru fram í vikunni að Handkastinu vitandi.

Fram hóf æfingaleikina með sannfærandi 46-26 sigri á Fjölni í Lambhagahöllinni á þriðjudag. Fjölnismenn eru með nýjan mann við stjórnvölinn en Gunnar Valur Arason tók nýverið við þjálfun liðsins. Mikið verkefni virðist bíða hans, en Fjölnir mætti auk þess án nokkurra lykilmanna í leiknum.

Á miðvikudag tók HK á móti Gróttu í Kórnum þar sem heimamenn höfðu betur, 32-30. Grótta, sem var hársbreidd frá því að tryggja sér sæti í Olís-deildinni á síðustu leiktíð, leiddi leikinn í hálfleik, 16-14, en HK sneri taflinu við eftir hlé og landaði tveggja marka sigri.

Þriðja og síðasta viðureign vikunnar fór fram í Virkinu á fimmtudagskvöld þegar nýliðar Víkings lögðu FH að velli, 34-33, í spennandi leik. Sigurinn gefur Víkingum góða byrjun á undirbúningstímabilinu fyrir endurkomuna í efstu deild en félagið hefur ekki riðið feitum hesti í deild þeirra bestu undanfarin ár.

Úrslit vikunnar:

• Fram – Fjölnir 46-26
• HK – Grótta 32-30 (14-16)
• Víkingur – FH 34-33

Handkastið hvetur félög, þjálfara, stjórnarmenn og aðra forsvarsmenn liða til að senda upplýsingar um æfingaleiki, úrslit og markaskorara í aðdraganda komandi tímabils. Þannig getum við haldið lesendum sem best upplýstum um undirbúning liðanna fyrir keppnistímabilið.