Eftir þrjá sigurleiki í þremur leikjum í riðlakeppni Evrópumótsins hefur íslenska U18 ára karla landsliðið tryggt sér sæti í milliriðli keppninnar. Ísland byrjar milliriðilinn með tvö stig.

Í milliriðlinum ásamt Íslandi er Ungverjaland sem Ísland vann sannfærandi í riðlakeppninni. Þá eru einnig Króatía og Portúgal en Króatía byrjar milliriðilinn einnig með tvö stig eftir þriggja marka sigur á Portúgal í riðlakeppninni. 

Fyrsti leikur Íslands í milliriðlinum verður á morgun, 3.ágúst gegn Króatíu klukkan 15:00 og síðan mætir liðið Portúgal á þriðjudaginn klukkan 15:00. Leikið verður í CCS Sumice höllinni í Belgrad.

Íslenska liðið hefur spilað einkar vel í fyrstu þremur leikjum sínum á mótinu og unnið þrjá sannfærandi sigra. Nú bíður þeirra tveir leikir en með góðri frammistöðu í milliriðlinum vinnur liðið sér sæti í 8-liða úrslitum keppninnar sem verður að teljast formsatriði miðað við spilamennsku liðsins hingað til og hversu öflugt liðið er.

Gunnar Róbertsson er markahæsti leikmaður íslenska liðsins á mótinu hingað til með 22 mörk en Alex Unnar Hallgrímsson og Freyr Aronsson koma næstir með 19 mörk hvor.