Þýski handboltavefurinn Handball-World.news fjallar ítarlega um komandi viðureign Íslands og Þýskalands í átta liða úrslitum Evrópumóts U18 ára karla sem fram fer í Serbíu á morgun, fimmtudag, klukkan 15:00 að íslenskum tíma.

Í umfjöllun miðilsins fer Erik Wudtke, þjálfari þýska U18 ára landsliðsins, fögrum orðum um íslenska liðið sem hefur farið sannfærandi í gegnum mótið og unnið alla fimm leiki sína.

„Ísland hefur að mínu mati verið sterkasta lið mótsins hingað til. Þeir spila á annan hátt en flest önnur lið og það verður ný og áhugaverð áskorun fyrir okkar stráka,“ segir Wudtke.

Íslenska liðið hefur verið eitt mest sannfærandi lið mótsins. Strákarnir hófu keppni með öruggum sigrum á Svartfjallalandi og Ungverjalandi áður en Sviss var lagt að velli í lokaleik riðilsins. Í milliriðlinum hélt liðið síðan áfram á sömu braut með sigrum á Króatíu og Portúgal og tryggði sér efsta sætið með fullt hús stiga.

Þjóðverjar fóru ekki jafn sannfærandi leið í átta liða úrslitin. Liðið hafnaði í þriðja sæti síns milliriðils en tryggði sér áfram sæti meðal átta bestu liðanna þar sem það var með næstbesta árangurinn af liðunum sem enduðu í þriðja sæti.

Liðin þekkjast vel frá síðasta ári. Ísland hafði betur 28-25, þegar þjóðirnar mættust í úrslitaleik Evrópsku æskulýðshátíðarinnar (EYOF). Þjóðverjar svöruðu síðan fyrir sig með 31-28 sigri á Merzig Cup síðar sama ár.

Að mati Wudtke liggur einn helsti styrkleiki íslenska liðsins í því að margir leikmannanna hafi þegar öðlast mikilvægt hlutverk með meistaraflokksliðum sínum. Leikmenn á borð við Gunnar Róbertsson, Freyr Aronsson, Ómar Darri Sigurgeirsson voru allir í stórum hlutverkum hjá liðum sínum, Val, Haukum og FH í Olís-deildinni á síðustu leiktíð.

„Íslensku strákarnir æfa daglega með sterkustu meistaraflokksliðum Íslands. Þar fá þeir að takast á við reynda leikmenn og njóta leiðsagnar öflugra þjálfara. Það skilar sér greinilega í leik þeirra,“ segir hann.

Þrátt fyrir virðinguna sem hann ber fyrir íslenska liðinu telur Wudtke að þýska liðið hafi tekið framförum eftir því sem mótið hefur þróast.

„Við höfum séð liðið stíga skref fram á við með hverjum leik. Markmiðið er að halda áfram á þeirri braut og nýta þetta tækifæri til að mæta einu sterkasta liði mótsins. Svona leikir eru dýrmæt reynsla fyrir okkar leikmenn og við ætlum að leggja allt í sölurnar,“ segir þýski landsliðsþjálfarinn.

Wudtke telur þó að pressan verði meiri á íslenska liðinu. „Leikurinn er þeirra að tapa en við einbeitum okkur að því að fá fleiri leiki gegn sterkustu þjóðunum. Kannski veldur staðan Íslendingunum einhverri spennu en hingað til hafa þeir alls ekki virst taugaóstyrkir.“

Leikur Íslands og Þýskalands hefst klukkan 15:00 á morgun og er sæti í undanúrslitum Evrópumótsins undir. Fyrir íslenska liðið er jafnframt tækifæri til að halda áfram glæsilegri sigurgöngu sinni og færa sig einu skrefi nær því að endurtaka sögulega Evrópumeistaratitilinn frá árinu 2003.