Íslenski landsliðamðurinn, Elvar Örn Jónsson yfirgefur þýsku meistarana í SC Magdeburg að loknu tímabilinu 2026/27. Félagið greinir frá þessu í dag.

Elvar Örn, sem er 28 ára gamall gekk til liðs við Magdeburg sumarið 2025 eftir fjögurra ára dvöl hjá MT Melsungen. Hann er á leið inn í sitt annað tímabil með Magdeburg sem urðu þýskir meistarar á síðustu leiktíð.

Hann á að baki langan feril í Danmörku og Þýskalandi en áður en hann fór til Melsungen lék hann með Skjern. Elvar Örn er uppalinn hjá Selfossi og hefur verið fastamaður í íslenska landsliðinu undanfarin ár.

„Það er mjög miður að Elvar hafi ákveðið að yfirgefa okkur fyrr en til stóð. Hann aðlagaðist okkur fljótt og fyllti fullkomlega upp í sitt hlutverk innan liðsins,“ segir Bennet Wiegert, þjálfari og framkvæmdastjóri íþróttamála hjá Magdeburg.

„Ég er hundrað prósent viss um að Elvar muni gefa allt fyrir félagið og liðið fram á síðasta dag sinn hjá SC Magdeburg.“

Elvar Örn kveðst hafa notið sín afar vel í Magdeburg og segist þakklátur fyrir tímann hjá félaginu.

„Ég hef átt frábæran tíma í Magdeburg og er þakklátur fyrir þá reynslu sem ég hef fengið hér. Frá fyrsta degi hef ég haft það mjög gott hjá félaginu, í liðinu og í borginni. Ég mun sakna stuðningsmannanna og þeirrar einstöku stemningar sem ríkir í GETEC Arena mjög mikið.“

„Að vinna þýska meistaratitilinn var sérstaklega stór stund og draumur sem rættist. Þótt leið mín liggi annað eftir þetta tímabil er allur minn fókus á SC Magdeburg. Ég mun gera allt sem í mínu valdi stendur til að við getum fagnað fleiri árangri saman og barist um titla.“

Elvar Örn verður því áfram hjá Magdeburg út næsta tímabil en fer síðan á vit nýrra ævintýra. Ekki hefur verið greint frá því hvaða félag verður hans næsti áfangastaður en hann hefur verið orðaður við Rhein Neckar Löwen.