Þrefaldir meistarar Vals í kvennaflokki kynntu nýjan leikmann til félagsins í kvöld þegar Katla María Magnúsdóttir var kynnt sem nýr leikmaður liðsins.

Katla María gengur í raðir Vals eftir eins árs dvöl hjá Holstebro í dönsku B-deildinni en liðið vann sér sæti í úrvalsdeildinni á síðustu leiktíð. Katla María var hinsvegar ekki í stóru hlutverki hjá liðinu og eftir að liðið tryggði sér sæti í úrvalsdeildinni var ljóst að kröftum Kötlu var ekki óskað eftir hjá félaginu.

Katla María sem er rétthent skytta kemur með mikla reynslu inn í ungt og efnilegt Valslið en töluverðar breytingar hafa orðið á liðinu frá síðustu leiktíð. Lovísa Thompson, Thea Imani Sturludóttir og Lilja Ágústsdóttir hafa allar yfirgefið félagið og leika erlendis á komandi tímabili.

Katla María sem er uppalin á Selfossi lék með Selfossi áður en hún gekk í raðir Holstebro fyrir síðasta tímabil en hún hefur einnig leikið með Stjörnunni hér á landi.

Þá var hún einnig í A landsliði Íslands og tók meðal annars þátt í Heimsmeistaramótinu sem haldið var í Stafangri árið 2023.

,,Ég er virkilega ánægður að Katla María hafi ákveðið að taka slaginn með okkur í vetur. Hún er frábær handboltakona, með mikinn kraft og mun styrkja liðið mikið. Hún er einnig flott fyrirmynd og leiðtogi. Hún kemur með mikil gæði í hópinn og á eftir að vera góð viðbót við hópinn okkar,” sagði Anton Rúnarsson, þjálfari liðsins.

Katla er þriðji leikmaðurinn sem gengur í raðir Vals í sumar en áður hefur liðið fengið Britney Cots og Mariu Beder frá Færeyjum.