Meistaradeild kvenna fór af stað í dag með fjórum leikjum og það voru útiliðin sem stálu senunni. Öll fjögur útiliðin fóru heim með tvö stig, þar á meðal úrslitaliðin frá síðasta tímabili, Metz og Györ.

Ríkjandi Evrópumeistarar Metz hófu titilvörnina með öruggum níu marka sigri á Storhamar í Noregi, 32:23, á meðan Györ þurfti að hafa meira fyrir hlutunum gegn Podravka í leik umferðarinnar en vann að lokum 26:23.

Í A-riðli sneri CSM Bucuresti erfiðri stöðu gegn Krim sér í hag með frábærum síðari hálfleik og vann 37:29. Team Esbjerg sýndi síðan styrk sinn í Dortmund þar sem Henny Reistad fór á kostum í 33:24 sigri danska liðsins.

Krim 29:37 CSM Búkaresti – CSM skipti um gír eftir hlé

Krim virtist lengi vel ætla að koma nokkuð á óvart gegn CSM Búkaresti í Ljubljana. Slóvenska liðið lék frábæran fyrri hálfleik og fór með tveggja marka forskot inn í leikhlé, 19:17.
Nina Zulic var nánast óstöðvandi hjá Krim og hafði skorað átta mörk strax fyrir hlé. CSM átti hins vegar í vandræðum með að finna taktinn og varnarleikurinn var langt frá því sem Bojana Popovic vildi sjá en það breyttist heldur betur í seinni hálfleik.
Tyra Axnér og félagar hófu síðari hálfleikinn af krafti og 5:1 kafli kom CSM yfir, 23:21. Varnarleikurinn þéttist verulega, markvarslan fylgdi í kjölfarið og rúmenska liðið fékk í kjölfarið tækifæri til að keyra upp hraðann.
Krim náði aldrei að svara og munurinn jókst jafnt og þétt þar til CSM fagnaði sannfærandi átta marka sigri, 37:29.
Valeriia Maslova var markahæst hjá CSM með sjö mörk en Daria Dmitrieva skoraði sex gegn sínum gömlu félögum. Nina Zulic var markahæst Krim með níu mörk.

Dortmund 24:33 Esbjerg – Reistad byrjaði með látum

Esbjerg sendi skýr skilaboð strax í fyrstu umferðinni þegar danska liðið vann öruggan 33:24 útisigur á Dortmund.
Esbjerg tók stjórnina snemma. Henny Reistad, Rikke Iversen og Live Rushfeldt Deila komu danska liðinu í 9:3 þegar fyrri hálfleikur var hálfnaður og Dortmund átti í miklum vandræðum með að finna leið í gegnum vörn gestanna.
Katharina Filter gerði heimakonum ekki auðveldara fyrir. Þýski markvörðurinn í liði Esbjerg varði 12 skot og endaði með 43 prósenta markvörslu.
Staðan var 17:9 í hálfleik og þótt Dortmund næði betri tökum á sóknarleiknum í seinni hálfleik, meðal annars með því að spila sjö gegn sex, var sigur Esbjerg aldrei í raunverulegri hættu.
Norska stórstjarnan Henny Reistad, sem varð markahæst í Meistaradeildinni á síðasta tímabili með 131 mark, virðist því ætla að halda áfram þar sem frá var horfið. En hún var gríðarlega öflug í liði Esbjerg og skoraði tíu mörk úr tíu skotum.
Mareike Thomaier var markahæst Dortmund með fjögur mörk.

Storhamar 23:32 Metz – meistararnir byrjuðu af krafti

Ríkjandi Evrópumeistarar Metz hófu titilvörnina eins og meistaraliði sæmir með öruggum 32:23 sigri á Storhamar í Noregi.
Storhamar hélt vel í við Metz fyrstu tíu mínúturnar og franska liðið náði ekki meira en tveggja marka forskoti. En eftir þessar fyrstu tímu mínútur tók Metz hins vegar yfir.
Anna Albek fór fyrir 4:0 kafla sem breytti stöðunni í 10:5 og vörn Evrópumeistaranna fór að bíta almennilega. Fyrir aftan hana var Sabrina Novotná í miklum ham og var með 44 prósenta markvörslu í fyrri hálfleik.
Metz leiddi 17:10 í hálfleik og tók endanlega af allan vafa strax í upphafi síðari hálfleiks. Evrópumeistararnir skoruðu fyrstu fjögur mörkin eftir hlé og Storhamar skoraði ekki sitt fyrsta mark í síðari hálfleik fyrr en á 38. mínútu.
Munurinn fór mest í ellefu mörk áður en Metz slakaði örlítið á klónni. Sigurinn var þó aldrei í hættu og lokatölur urðu 32:23.
Lucie Granier, Anna Albek og Lylou Borg skoruðu allar sex mörk fyrir Metz, en Sanne Løkka Hagen var markahæst Storhamar með fimm. Novotná lauk leik með 15 varin skot og 42 prósenta markvörslu.

Podravka 23:26 Györ – Stanko sá um gömlu félagana

Györ þurfti mest að hafa fyrir sínum tveimur stigum af útiliðunum fjórum þegar ungverska stórveldið heimsótti Podravka í leik umferðarinnar.
Króatíska liðið byrjaði af krafti og komst í 2:0 áður en Tjaša Stanko skoraði fyrsta mark Györ eftir fjórar og hálfa mínútu. Katarina Pandža hélt Podravka vel inni í leiknum og skoraði sex mörk í fyrri hálfleik.
Stanko tók hins vegar leikinn yfir fyrir Györ. Hún þekkir vel til hjá Podravka eftir að hafa leikið með félaginu tímabilið 2019/20 og skoraði sjö mörk fyrir hlé, þar af fimm af vítalínunni.
Györ fór með 15:11 forskot inn í hálfleik og virtist ætla að ganga frá leiknum þegar liðið náði átta marka forskoti, 21:13, á 41. mínútu.
Podravka neitaði hins vegar að gefast upp. Markverðirnir Lucija Bešen og Anica Gudelj vörðu meðal annars vítaköst og heimakonur náðu 3:0 kafla sem hleypti spennu aftur í leikinn.
Það sem reyndist Podravka dýrast voru tapaðir boltar. Heimaliðið nýtti skotin sín vel, með 70 prósenta skotnýtingu gegn aðeins 52 prósentum hjá Györ, en 22 tapaðir boltar komu í veg fyrir að króatíska liðið næði að fullkomna endurkomuna.
Györ hélt út og fagnaði 26:23 sigri.
Stanko var valin maður leiksins eftir að hafa skorað átta mörk. Tina Barišic og Katarina Pandža skoruðu sex mörk hvor fyrir Podravka.
Sarah Bouktit kom inn á eftir um 20 mínútna leik og lék þar með sinn fyrsta Meistaradeildarleik fyrir Györ eftir félagaskiptin frá Evrópumeisturum Metz í sumar.

Sunnudagsleikirnir eftir

Fyrstu umferðinni lýkur á sunnudag með fjórum leikjum. Þar verður meðal annars íslenskur vinkill þegar Díana Dögg Magnúsdóttir og Elín Rósa Magnúsdóttir og félagar í HSG Blomberg-Lippe leika fyrsta Meistaradeildarleik í sögu félagsins þegar Gloria Bistrita kemur í heimsókn.
Þá tekur Sola á móti Brest Bretagne, Buducnost fær FTC-Toyota Kovács í heimsókn og dönsku liðin Nykøbing Falster og Odense eigast við.

Sunnudagur 6. september – íslenskur tími
12:00 HSG Blomberg-Lippe – Gloria Bistrita
14:00 Sola – Brest Bretagne
14:00 Buducnost – FTC-Toyota Kovács
14:00 Nykøbing Falster – Odense