Handknattleikssamband Íslands, HSÍ, hefur sent frá sér yfirlýsingu í kjölfar þess að Sérsveitin, stuðningsmannasveit íslensku landsliðanna í handbolta, tilkynnti að hún myndi ekki ferðast á heimsmeistaramót karla í Þýskalandi í janúar vegna kostnaðar og miðamála.

Í yfirlýsingunni kemur fram að HSÍ glími við krefjandi fjárhagsstöðu sem hafi kallað á verulegan niðurskurð í starfsemi sambandsins. Af þeim sökum sjái sambandið sér ekki fært að styrkja Sérsveitina á næstu tveimur stórmótum, Evrópumóti kvenna í desember og heimsmeistaramóti karla í janúar.

Sérsveitin verður ekki með Íslandi á HM

HSÍ hefur undanfarin ár styrkt starfsemi Sérsveitarinnar fjárhagslega og kemur fram í tilkynningunni að styrkur sambandsins hafi numið á fjórðu milljón króna á síðasta ári.

„Undanfarin ár hefur HSÍ stutt við starf Sérsveitarinnar og nam styrkur sambandsins til sveitarinnar á fjórðu milljón á síðasta ári. Það endurspeglar þá miklu þýðingu sem við leggjum í stuðning þeirra og framlag til íslensks handbolta. Núverandi fjárhagsstaða gerir okkur hins vegar ekki kleift að halda þeim stuðningi áfram að svo stöddu,“ segir í yfirlýsingu HSÍ.

Verulegur niðurskurður hjá landsliðunum

Í tilkynningunni er jafnframt greint frá því að fjárhagsstaða sambandsins hafi haft veruleg áhrif á starfsemi íslensku landsliðanna.

Sem dæmi nefnir HSÍ að draga hafi þurft úr fjölda starfsmanna sem fylgdu yngri landsliðum Íslands á stórmót síðasta sumar. HSÍ segir að staðan kalli á erfiðar ákvarðanir og forgangsröðun í rekstri sambandsins.

„Á stórmótum yngri landsliða síðastliðið sumar þurfti til að mynda að draga verulega úr mannafla í kringum liðin. Aðeins fjórir starfsmenn fylgdu hverju landsliði, á sama tíma og sambærileg landslið mótherja okkar hafa í mörgum tilvikum allt að níu starfsmenn með sér.“

Leggja áherslu á mikilvægi Sérsveitarinnar

Í yfirlýsingunni þakkar HSÍ Sérsveitinni fyrir framlag hennar til íslensks handbolta og undirstrikar mikilvægi stuðningsmannasveitarinnar fyrir landsliðin.

„Sérsveitin hefur um árabil verið mikilvægur hluti af íslenskri handboltamenningu og á stóran þátt í þeirri einstöku stemningu sem fylgir íslensku landsliðunum á stórmótum. Stuðningur þeirra skiptir leikmenn, þjálfara og íslenskan handbolta gríðarlega miklu máli.“

Sérsveitin hafði áður greint frá því að ákvörðunin um að sitja heima á HM hefði ekki verið tekin af léttúð.

„Þetta er ákvörðun sem við tókum ekki af léttúð, en vegna kostnaðar og miðamála þá sitjum við heima þetta árið,“ sagði í tilkynningu stuðningsmannasveitarinnar.

Ísland hefur leik á heimsmeistaramóti karla þann 15. janúar og leikur í H-riðli ásamt Norður-Makedóníu, Barein og Japan. Riðillinn verður leikinn í Magdeburg. HSÍ segir að þrátt fyrir erfiða fjárhagsstöðu sé markmið sambandsins áfram að efla íslenskan handbolta og styðja við landsliðin.

„Við vitum að stórmót snúast ekki aðeins um það sem gerist inni á vellinum. Þau snúast líka um samstöðu, þjóðarstolt og kraftinn sem myndast þegar við stöndum saman,“ segir meðal annars í yfirlýsingunni.