Franska landsliðskonan Lylou Borg sem leikur með franska stórliðinu Metz hefur orðið fyrir alvarlegu áfalli eftir að hafa fótbrotnað á æfingu með franska landsliðinu á mánudaginn. Ekki liggur fyrir hversu lengi hún verður frá keppni.

Borg, sem er 21 árs gömul, meiddist á hægri fæti á æfingu franska landsliðsins á mánudaginn. Hún gekkst undir rannsóknir síðar sama dag og staðfestu þær að um beinbrot væri að ræða.

Franska handknattleikssambandið staðfesti meiðslin í tilkynningu á þriðjudaginn og greindi jafnframt frá því að Borg hefði yfirgefið landsliðshópinn. Hún sneri aftur til Metz þar sem hún hefur hafið meðferð og endurhæfingu undir handleiðslu læknateymis félagsins.

Meiðslin koma á afar slæmum tíma fyrir Borg sem hefur verið að festa sig í sessi hjá bæði Metz og franska landsliðinu. Borg var valin besti ungi leikmaður tímabilsins 2025/26 hjá Handknattleikssambandi Evrópu, EHF, eftir frábæra frammistöðu með Metz í Meistaradeild Evrópu.

Hún hefur einnig fengið sífellt stærra hlutverk í sóknarleik franska stórliðsins á yfirstandandi tímabili. Nú ríkir hins vegar óvissa um hvort hún verði tilbúin fyrir Evrópumót kvenna sem hefst 3. desember.