Sveinn Jóhannsson og félagar hans í Chambéry unnu sinn fyrsta sigur á tímabilinu í frönsku úrvalsdeildinni í gærkvöldi þegar liðið vann sannfærandi 38-29 útisigur gegn Dunkerque. Tumi Steinn Rúnarsson var hins vegar fjarverandi vegna meiðsla þegar Bärnbach/Köflach tapaði fyrir Handball Tirol í Austurríki, 29-26.

Handball Tirol er á toppi deildarinnar í Austurríki með sex stig að loknum þremur leikjum. Tumi Steinn og félagar eru hinsvegar með tvö stig.

Chambéry hafði tapað fyrstu tveimur leikjum sínum í frönsku úrvalsdeildinni en liðið svaraði heldur betur fyrir sig gegn Dunkerque.

Gestirnir frá Chambéry leiddu með þremur mörkum í hálfleik, 17-14, og tóku síðan öll völd í síðari hálfleik. Sóknarleikurinn gekk afar vel og að lokum varð niðurstaðan öruggur níu marka sigur, 38-29.

Sveinn Jóhannsson skoraði eitt mark fyrir Chambéry í leiknum. Lucas Vanègue var markahæstur liðsins með átta mörk úr tíu skotum og gaf auk þess 13 stoðsendingar. Elio Zammit skoraði sjö mörk og Emilien Peyronnet sex.