Karlalið Hauka dróst gegn Handball Esch frá Lúxemborg í 64-liða úrslitum Evrópubikarsins en dregið var í 2. umferð keppninnar í morgun.

Haukar sátu hjá í fyrstu umferð keppninnar og fara því beint inn í 64-liða úrslitin. Alls eru 64 lið eftir í keppninni, þar af 45 sem sátu hjá í fyrstu umferð og 19 sem tryggðu sér áframhaldandi þátttöku um helgina. 

Handball Esch þurfti hins vegar að fara í gegnum 1. umferðina. Lúxemborgarliðið mætti GRK Tikves frá Norður-Makedóníu og fóru báðir leikirnir fram þar í landi um síðustu helgi. Esch vann fyrri leikinn 30-27 en tapaði þeim síðari 33-32 og fór því áfram, 62-60 samanlagt. 

Handball Esch tók þátt í Evrópubikarnum á síðustu leiktíð og féll þá úr leik í fyrstu umferð gegn Vogošca frá Bosníu og Hersegóvínu. Tímabilið 2024/25 komst Esch í 2. umferð þar sem HC Motor sló liðið úr keppni.

Leikirnir í 64-liða úrslitunum eiga samkvæmt leikjadagatali EHF að fara fram helgarnar 17.–18. október og 24.–25. október.