HC Erlangen vann afar sannfærandi sigur á Eisenach, 28–19, á heimavelli í þýsku úrvalsdeildinni í handbolta í kvöld.

Viggó Kristjánsson skoraði tvö mörk fyrir Erlangen, annað þeirra af vítalínunni.

Erlangen byrjaði betur og náði fjögurra marka forskoti, 8–4, um miðjan fyrri hálfleik. Eisenach svaraði hins vegar vel og jafnaði metin í 9–9 þegar sjö mínútur voru eftir af fyrri hálfleik. Heimamenn tóku aftur við sér fyrir hlé og Viggó skoraði síðasta mark fyrri hálfleiksins úr vítakasti og kom Erlangen í 14–11.

Eisenach byrjaði seinni hálfleikinn af krafti og jafnaði metin í 16–16 eftir 38 mínútna leik. Erlangen náði aftur undirtökunum en þegar tíu mínútur voru eftir var munurinn aðeins eitt mark, 20–19.

Þá hrundi leikur Eisenach algjörlega.

Erlangen skoraði síðustu átta mörk leiksins og hélt gestunum markalausum síðustu tíu mínúturnar. Lokatölur urðu því 28–19 eftir að staðan hafði verið 20–19. Viggó skoraði seinna mark sitt í leiknum þegar hann kom Erlangen í 20–17 en hann hafði skömmu áður misnotað vítakast.

Marek Nissen og Yannik Bialowas voru markahæstir hjá Erlangen með fimm mörk hvor en Eloy Morante Maldonado skoraði fjögur. David Móré var markahæstur hjá Eisenach með fjögur mörk.

Sigurinn var sá fjórði í röð hjá Erlangen í öllum keppnum og sá þriðji í röð í þýsku úrvalsdeildinni. Erlangen er nú með sjö stig eftir fyrstu sex leiki tímabilsins. Eisenach er hins vegar með þrjú stig eftir sex leiki og er án sigurs á útivelli á tímabilinu.