Ole Gustav Gjekstad, þjálfari kvennalandsliðs Noregs , hefur valið 19 leikmenn í undirbúningshóp sinn fyrir Evrópumót kvenna sem hefst í desember. Athygli vekur að sex leikmenn í hópnum hafa aldrei áður tekið þátt í stórmóti með norska landsliðinu.

Noregur er ríkjandi heims- og Evrópumeistari og hefur verið eitt sigursælasta landslið heims undanfarna áratugi. Nú virðist Gjekstad ætla að blanda saman reynslu og nýjum kynslóðum leikmanna.

Meðal þeirra sem eru að fara í sitt fyrsta stórmót, verði þær valdar í lokahópinn, eru Henriette Espetvedt Eggen, leikmaður Team Esbjerg, og Mia Solberg Svele, sem leikur með Nykøbing Falster.

Eggen hefur vakið athygli fyrir öflugan varnarleik með Esbjerg en hefur ekki áður leikið A-landsleik fyrir Noreg. Hinir fjórir nýliðarnir eru Frida Brandbu Andersen, Stella Waagan Kruse, Tuva Ulsaker Høve og Kristin Venn.

Reynslumiklar landsliðskonur utan hóps

Athygli vekur að Vilde Mortensen Ingstad og Stine Skogrand eru ekki í 19 manna hópnum. Báðar hafa verið mikilvægar í norska landsliðinu undanfarin ár. Gjekstad hefur þó tekið fram að þær séu áfram á 35 manna bráðabirgðalistanum og geti komið inn í hópinn síðar.

Nora Mørk er hins vegar í hópnum þrátt fyrir að hafa glímt við meiðsli að undanförnu. Þá eru stórstjörnurnar Henny Reistad, Kari Brattset Dale og Silje Solberg-Østhassel einnig á sínum stað.

„Reynsla, framtíðarsýn og gæði,“ sagði Gjekstad þegar hann var beðinn um að lýsa hópnum í þremur orðum.

Hann lagði áherslu á að þótt mikilvægt væri að horfa til framtíðar væri hópurinn fyrst og fremst valinn út frá núverandi getu leikmannanna.

„Við erum með 35 leikmenn á bráðabirgðalistanum og höfum nú valið 19 sem fara í undirbúninginn. Við staðfestum endanlegan EM-hóp skömmu áður en við leggjum af stað á mótið,“ sagði Gjekstad.

Norska liðið tekur þátt í fjögurra þjóða móti í Stjørdal í lok nóvember áður en haldið verður til Rúmeníu.

Noregur leikur í riðli með Rúmeníu, Sviss og Norður-Makedóníu á Evrópumótinu.

19 manna hópur Noregs:

Markverðir: 
Silje Solberg-Østhassel
Eli Marie Raasok
June Cecilie Krogh.

Aðrir leikmenn: 

Frida Brandbu Andersen
Live Rushfeldt Deila
Nora Mørk
Kari Brattset Dale
Kristine Breistøl
Tuva Ulsaker Høve
Stella Waagan Kruse
Selma Helén Henriksen
Ingvild Kristiansen Bakkerud
Henny Reistad
Emilie Hovden
Henriette Espetvedt Eggen
Kristin Venn
Mia Solberg Svele
Thale Rushfeldt Deila
Ane Cecilie Høgseth.