Það verður hart barist um toppsætin þegar áttunda umferð Meistaradeildar kvenna fer fram um helgina. FTC fær tækifæri til að hefna fyrsta taps tímabilsins gegn Team Esbjerg, þar sem Jesper Jensen mætir verðandi félagi sínu öðru sinni á einni viku. Á sama tíma bíður íslensku landsliðskvennanna Díönu Daggar Magnúsdóttur og Elínar Rósu Magnúsdóttur annað risaverkefni gegn Györ, aðeins viku eftir fimmtán marka tap Blomberg-Lippe fyrir ungverska stórliðinu.

Áttunda umferðin verður jafnframt sú síðasta í Meistaradeildinni á árinu 2026 áður en hlé verður gert vegna Evrópumóts kvenna í desember. Liðin mætast nú aftur með aðeins viku millibili og því er nóg um hefndarhug eftir úrslit síðustu helgar.

Í A-riðli eru FTC og Esbjerg jöfn með tólf stig á toppnum. Ungverska liðið hafði unnið fyrstu sex leiki sína áður en Esbjerg batt enda á sigurgönguna með 29:26 sigri síðasta sunnudag. Nú hefur FTC heimavöllinn með sér og freistar þess að endurheimta frumkvæðið í toppbaráttunni.

Í B-riðli halda ríkjandi Evrópumeistarar Metz og sjöfaldir meistarar Györ áfram taplaus. Metz heimsækir Odense eftir nauman sigur um síðustu helgi, á meðan Györ tekur á móti Blomberg-Lippe í leik þar sem þýska liðið freistar þess enn að ná sínum fyrstu stigum.

Þá verður athyglin á CSM Bucuresti sem mætir Brest með nýjan þjálfara í brúnni eftir stórt tap í Frakklandi. Alls verða átta leikir á dagskrá laugardaginn 14. og sunnudaginn 15. nóvember og ljóst að mikið er undir áður en keppnin fer í langt hlé.

A-riðill

FTC - Team Esbjerg | Sunnudagur 15.nóvember kl 13:00
Það verður sannkallaður toppslagur í Ungverjalandi þegar FTC tekur á móti Team Esbjerg í síðari viðureign liðanna á aðeins átta dögum.

FTC hafði farið taplaust í gegnum fyrstu sex umferðir Meistaradeildarinnar en varð að sætta sig við sitt fyrsta tap á tímabilinu þegar Esbjerg vann 29:26 sigur í Danmörku um síðustu helgi. Nú fá Ungverjarnir tækifæri til að svara fyrir sig á heimavelli og um leið ná forskoti í baráttunni um efsta sæti A-riðils. Bæði lið eru með tólf stig eftir sjö leiki og því er mikið undir.

Liðin hafa verið nánast jafnöflug sóknarlega. Esbjerg hefur skorað 220 mörk í fyrstu sjö leikjunum og FTC 219. Ungverska liðið hefur hins vegar verið sterkara varnarlega og fengið á sig 179 mörk á móti 187 mörkum Esbjerg.

Henny Reistad heldur áfram að fara á kostum fyrir danska liðið og er markahæst allra leikmanna Meistaradeildarinnar með 59 mörk. Hún skoraði sjö mörk í fyrri viðureign liðanna og verður án efa í lykilhlutverki á sunnudaginn. Hjá FTC hefur Petra Simon verið atkvæðamest með 42 mörk.

Leikurinn verður einnig sérstakur fyrir Jesper Jensen, þjálfara FTC, sem tekur við Esbjerg að loknu tímabilinu. Hann þekkir því vel til danska félagsins og mætir nú verðandi lærimeyjum sínum öðru sinni á skömmum tíma.

Þrátt fyrir sterkan heimavöll hefur FTC ekki átt auðvelt með Esbjerg í gegnum tíðina. Ungverska liðið hefur aðeins unnið eina af fimm fyrri heimaviðureignum sínum gegn danska félaginu.

CSM Bucuresti – Brest | Sunnudagur 15. nóvember kl. 15:00 – Leikur umferðarinnar
Það verða miklar breytingar hjá CSM Bucuresti þegar rúmenska liðið tekur á móti Brest í leik umferðarinnar.

CSM tapaði 25:40 fyrir Brest í Frakklandi um síðustu helgi og var það stærsta tap félagsins gegn franska liðinu til þessa. Úrslitin urðu til þess að breytingar voru gerðar á þjálfarateymi rúmenska liðsins. Bojana Popović lét af störfum eftir samkomulag við félagið og Iulia Curea hefur tekið við stjórn CSM.

Curea fær því sannkallaða eldskírn í sínum fyrsta leik við stjórnvölinn þegar hún mætir Brest, sem sýndi mikinn styrk í fyrri viðureigninni.

Brest hafði tapað tveimur leikjum í röð, gegn FTC og Esbjerg, áður en liðið vann stórsigurinn á CSM. Franska liðið ætlar sér nú að fylgja þeim úrslitum eftir og styrkja stöðu sína í efri hluta riðilsins.

Sóknarleikur liðanna hefur verið nokkuð jafn yfir tímabilið. Brest hefur skorað 212 mörk í sjö leikjum, eða 30,3 að meðaltali, á meðan CSM hefur skorað 209 mörk, sem gera 29,9 mörk í leik.

Valeriia Maslova hefur verið markahæst hjá CSM með 41 mark en Tamara Horacek hefur skorað 38 fyrir Brest. Franska liðið hefur jafnframt staðfest að fyrirliðinn Pauline Coatanea hafi framlengt samning sinn við félagið um eitt ár. Hún hyggst leggja skóna á hilluna að loknu tímabilinu 2027/28.

Fyrir CSM verður leikurinn mikilvægur, ekki aðeins vegna stiganna heldur einnig til að endurheimta sjálfstraust eftir tvö erfið töp í röð. Spurningin er hvort þjálfaraskiptin skili strax viðbrögðum eða hvort Brest haldi áfram þar sem frá var horfið um síðustu helgi.

Sola – Krim | Sunnudagur 15. nóvember kl. 15:00
Sola hefur heldur betur snúið við blaðinu eftir erfiða byrjun í Meistaradeildinni og freistar þess nú að vinna sinn þriðja leik í röð þegar Krim kemur í heimsókn til Noregs.

Norska liðið tapaði fyrstu fimm leikjum sínum en hefur síðan unnið tvo sannfærandi sigra. Fyrst kom óvæntur 30:22 útisigur á CSM Bucuresti og síðan 29:22 sigur á Krim í Slóveníu um síðustu helgi. Sola lagði grunninn að sigrinum gegn Krim með frábærum fyrri hálfleik þar sem norska liðið leiddi 18:9 í leikhléi.

Krim hefur hins vegar aðeins unnið einn leik á tímabilinu, gegn Buducnost í sjöttu umferð, en sá sigur batt enda á tíu leikja taphrinu slóvenska liðsins.

Frida Brandbu Andersen hefur verið markahæst hjá Sola með 36 mörk, en Nina Zulic hefur skorað 37 fyrir Krim.

Þrátt fyrir slakt gengi hefur Krim verið með öflugri sóknarleik en Sola yfir tímabilið. Slóvenska liðið hefur skorað 27,3 mörk að meðaltali í leik á móti 26,1 marki Sola.

Sola vann sinn fyrsta sigur gegn Krim í Evrópukeppnum um síðustu helgi, eftir að hafa tapað fyrri viðureign liðanna og gert eitt jafntefli. Fyrir norska liðið er tækifærið stórt. Með þriðja sigrinum í röð gæti Sola komið sér í mun betri stöðu áður en langt hlé verður gert á keppninni.

Buducnost – Borussia Dortmund | Sunnudagur 15. nóvember kl. 15:00
Buducnost og Borussia Dortmund mætast öðru sinni á einni viku eftir dramatískan leik í Þýskalandi síðasta sunnudag.

Þá tryggði Jovana Skrobić Buducnost 25:24 sigur með marki þegar aðeins þrjár sekúndur voru eftir af leiknum. Dortmund hafði leitt 13:9 í hálfleik en missti frumkvæðið í síðari hálfleik og varð að sætta sig við sárt tap á heimavelli.

Nú fá Þjóðverjarnir tækifæri til að hefna þess í Podgorica.

Dortmund er í fimmta sæti A-riðils með sex stig eftir sjö leiki. Allir þrír sigrar liðsins komu í þriggja leikja sigurgöngu frá þriðju til fimmtu umferðar. Buducnost er hins vegar í sjöunda sæti með fjögur stig eftir tvo sigra.

Svartfellska liðið hefur átt í erfiðleikum í sóknarleiknum og er með fæst mörk allra liða í Meistaradeildinni. Buducnost hefur aðeins skorað 160 mörk í sjö leikjum, eða 22,9 að meðaltali. Dortmund hefur hins vegar átt í meiri vandræðum varnarlega og fengið á sig 221 mark á móti 189 mörkum Buducnost.

Đurđina Jauković hefur verið markahæst hjá Buducnost með 41 mark og Jovana Skrobić hefur skorað 35. Hjá Dortmund hefur Alina Grijseels skorað 34 mörk og Merel Freriks 29.

Dortmund hefur unnið tvær af síðustu þremur heimsóknum sínum til Podgorica og því er ljóst að þýska liðið getur náð góðum úrslitum á útivelli.

B-riðill

Storhamar – Nykøbing | Laugardagur 14. nóvember kl. 15:00
Storhamar getur styrkt stöðu sína verulega í baráttunni um efri sæti B-riðils þegar norska liðið tekur á móti Nykøbing á laugardag.

Liðin mættust í Danmörku um síðustu helgi þar sem Storhamar vann sannfærandi 31:25 sigur eftir að hafa lagt grunninn að honum með frábærum fyrri hálfleik. Norska liðið leiddi 22:12 í leikhléi og þrátt fyrir betri frammistöðu Nykøbing eftir hlé tókst danska liðinu aldrei að ógna sigrinum.

Storhamar hefur nú unnið þrjá af síðustu fjórum leikjum sínum í Meistaradeildinni og situr í fjórða sæti riðilsins með átta stig. Nykøbing hefur hins vegar tapað fjórum leikjum í röð og er í sjöunda sæti með þrjú stig.

Þrátt fyrir slakt gengi hefur danska liðið tvo af markahæstu leikmönnum keppninnar innan sinna raða. Clara Lerby hefur skorað 53 mörk og er næstmarkahæst allra, á meðan Mia Svele hefur skorað 45 mörk og er í fjórða sæti markalistans ásamt öðrum leikmönnum.

Svele var sérstaklega öflug í fyrri viðureign liðanna og skoraði níu mörk, en það dugði skammt gegn sterkri liðsheild Storhamar. Hjá norska liðinu hefur Christina Pedersen verið markahæst með 37 mörk, þar af sjö í síðasta leik gegn Nykøbing.

Storhamar hefur haft gott tak á danska liðinu í gegnum tíðina og unnið fjórar af fimm viðureignum félaganna. Einum leik lauk með jafntefli.

Györ – Blomberg-Lippe | Laugardagur 14. nóvember kl. 17:00
Íslensku landsliðskonurnar Díana Dögg Magnúsdóttir og Elín Rósa Magnúsdóttir eiga annað risaverkefni fyrir höndum þegar Blomberg-Lippe heimsækir sjöfalda Evrópumeistara Györ í Ungverjalandi.

Liðin mættust í Þýskalandi um síðustu helgi þar sem Györ vann öruggan fimmtán marka sigur, 36:21, og sýndi hvers vegna ungverska liðið er eitt það sterkasta í Evrópu. Blomberg náði þó að halda í við stórveldið framan af og var staðan 7:7 eftir fimmtán mínútur. Þá tók Györ öll völd og leiddi 19:12 í hálfleik áður en forskotið jókst enn frekar eftir hlé.

Markverðir Györ, Zsófi Szemerey og Hatadou Sako, áttu stóran þátt í sigrinum og vörðu samtals sautján skot.

Györ er enn taplaust í Meistaradeildinni og situr í öðru sæti B-riðils með þrettán stig, jafnmörg og Metz sem er með betri markatölu. Blomberg er hins vegar enn án stiga eftir sjö umferðir á sínu fyrsta tímabili í keppninni.

Munurinn á liðunum hefur verið mikill, sérstaklega í sóknarleiknum. Györ hefur skorað 229 mörk í fyrstu sjö leikjunum og er með næstmarkahæstu sókn keppninnar. Blomberg hefur hins vegar aðeins skorað 164 mörk og er með næstfæst mörk allra liða.

Tjaša Stanko hefur verið markahæst hjá Györ með 41 mark en Nieke Kühne hefur skorað 39 mörk fyrir Blomberg.

Fyrir Díönu Dögg og Elínu Rósu verður leikurinn enn eitt stórt verkefni á þeirra fyrsta tímabili í Meistaradeildinni. Þótt Blomberg sé enn án stiga hefur þátttakan veitt liðinu dýrmæta reynslu gegn bestu félagsliðum heims.

Podravka – Gloria Bistrita | Laugardagur 14. nóvember kl. 17:00
Gloria Bistrita freistar þess að vinna sinn fjórða leik í röð þegar rúmenska liðið heimsækir Podravka í Króatíu.

Liðin mættust um síðustu helgi í Rúmeníu þar sem Bistrita vann 33:29 sigur eftir ótrúlegan kafla í síðari hálfleik. Podravka hafði leitt 15:14 í hálfleik og liðin voru jöfn, 23:23, þegar Bistrita tók öll völd. Rúmenska liðið skoraði þá átta mörk í röð á innan við sex mínútum og breytti stöðunni í 31:23. Sá kafli reyndist Podravka dýrkeyptur og Bistrita fagnaði sínum fyrsta sigri gegn króatíska liðinu í Evrópukeppnum.

Bistrita er nú í þriðja sæti B-riðils með tíu stig eftir sjö leiki og hefur unnið síðustu þrjár viðureignir sínar. Podravka er hins vegar í sjötta sæti með fjögur stig og hefur aðeins unnið einn af þremur heimaleikjum sínum á tímabilinu.

Katarina Pandža hefur verið atkvæðamest hjá Podravka með 47 mörk og er þriðja markahæst í Meistaradeildinni. Hjá Bistrita hefur Johanna Reichert skorað 45 mörk og Danila So Delgado 41. Báðar eru meðal tíu markahæstu leikmanna keppninnar.

Bistrita hefur leikið af miklum krafti undanfarnar vikur og getur með sigri styrkt stöðu sína í þriðja sæti riðilsins. Podravka þarf hins vegar á stigunum að halda til að halda sér í baráttunni um sæti í útsláttarkeppninni.

Odense – Metz | Sunnudagur 15. nóvember kl. 17:00
Ríkjandi Evrópumeistarar Metz freista þess að halda taplausri göngu sinni áfram þegar franska liðið heimsækir Odense í Danmörku.

Liðin mættust í Frakklandi um síðustu helgi þar sem Metz vann dramatískan 33:31 sigur eftir að hafa þurft að hafa verulega fyrir stigunum. Odense leiddi 16:15 í hálfleik og var tveimur mörkum yfir, 27:25, þegar langt var liðið á síðari hálfleik. Metz sýndi hins vegar mikla seiglu á lokakaflanum og sneri leiknum sér í hag.

Sigurinn var sá sjötti hjá Metz á tímabilinu og franska liðið hefur nú leikið sextán leiki í röð án taps í Meistaradeildinni. Metz situr á toppi B-riðils með þrettán stig, jafnmörg og Györ, en hefur betri markatölu. Odense er hins vegar í fimmta sæti með fimm stig eftir sjö leiki og hefur tapað síðustu tveimur viðureignum sínum.

Sóknarleikur Metz hefur verið sá öflugasti í Meistaradeildinni. Franska liðið hefur skorað 242 mörk í fyrstu sjö leikjunum, eða 34,6 mörk að meðaltali í leik.

Kristina Jørgensen hefur verið markahæst hjá Metz með 29 mörk en Viola Leuchter hefur skorað 31 mark fyrir Odense.

Þrátt fyrir tap um síðustu helgi hefur Odense sýnt að liðið getur staðið í Evrópumeisturunum. Danska liðið sló Metz meðal annars út í undanúrslitum Meistaradeildarinnar vorið 2025 eftir framlengdan leik. Nú fær Odense tækifæri til að endurtaka þann árangur á heimavelli og um leið stöðva taphrinu sína. Metz ætlar sér hins vegar að halda toppsætinu og fara taplaust inn í landsleikjahléið.