Nokkrir íslenskir handknattleiksmenn komu við sögu með liðum sínum í Evrópu í gærkvöldi og víðar um álfuna, þar sem markaskorun, stoðsendingar og mikilvæg stig unnust.

Sveinn Jóhannsson skoraði þrjú mörk þegar Chambéry vann Dijon 34-30 á útivelli í efstu deild í Frakklandi.

Í austurrísku úrvalsdeildinni skoraði Tumi Steinn Rúnarsson tvö mörk þegar Alpla Hard tapaði óvænt gegn Jags 30-26. Tryggvi Garðar Jónsson komst ekki á blað í markaskorun. Alpla Hard er í 2. sæti deildarinnar með 21 stig eftir 18 leiki jafn mörg stig og Voslauer.

Í Noregi bætti Tryggvi Þórisson við einu marki þegar Elverum vann öruggan sigur á Bækkelaget, 33:26, á heimavelli. Elverum er með sex stiga forskot á toppi norsku úrvalsdeildarinnar þegar aðeins sex umferðir eru eftir, þó Kolstad eigi leik til góða. 

Í þýsku 2. deildinni skoraði Tjörvi Týr Gíslason eitt mark fyrir HC Oppenweiler/Backnang sem tapaði fyrir Eintacht Hagen 42-27. Staða liðsins er áfram erfið því liðið situr á botni deildarinnar með aðeins tvö stig. Á sama tíma tapaði Elmar Erlingsson og félagar í Nordhorn-Lingen með ellefu mörkum gegn Potsdam 34-23. Elmar skoraði eitt mark í leiknum og gaf fjórar stoðsendingar. Erfiðlega hefur gengið hjá Nordhorn síðustu vikur.

Stiven Tobar Valencia og félagar hans í Benfica komust í átta liða úrslit portúgölsku bikarkeppninnar í gærkvöldi þegar þeir höfðu betur gegn Carvalhos 36-28 á útivelli. Stiven Tobar skoraði þrjú mörk í leiknum en hann er í landsliðshópi Íslands sem kemur saman eftir helgi.