Stjarnan tók á móti Fram í 21.umferð Olís deildar kvenna í Garðabænum í kvöld.

Heimakonur þurftu nauðsynlega á sigri að halda í þeirri miklu fallbaráttu sem þær voru í og var jafnvel uppi sú staða að þær gætu fallið ef Selfoss myndi ná hagstæðum úrslitum í kvöld og Stjarnan ekki.

Jafnt var nánast á öllum tölum í fyrri hálfleik og skiptust liðin á því að hafa frumkvæðið en mikið var skorað í fyrri hálfleik í Mýrinni í kvöld. Stjarnan leiddi þó með einu marki, 18-17, í hálfleik en það var Sara Katrín Gunnarsdóttir sem kom þeim yfir með marki rétt áður en hálfleiksflautan gall.

Stjarnan hélt uppteknum hætti í síðari hálfleik og náðu mest þriggja marka forskoti og voru 33-30 yfir þegar tæplegan sjö mínútur voru eftir af leiknum. Fram náði hins vegar að jafna leikinn í 34-34 og hafði tækifæri á að stela sigrinum í lokin en skot Huldu Dagsdóttur náði ekki á markið og jafntefli því niðurstaðan.

Stjarnan jafnar því Selfoss að stigum í deildinni en Selfyssingar hafa ennþá betri innbirgðis svo Stjarnan þarf að treysta á að ná í annað stig til þess að koma sér í umspilssæti. Heimakonur eru eflaust hundfúlar að hafa ekki fengið meira úr leiknum því tækifærið var svo sannarlega til staðar.

Natasja Hammer var markahæst í liði Stjörnunnar í kvöld með 7 mörk en hjá Fram var Dagmar Guðrún Pálsdóttir frábær með 10 mörk úr 11 skotum.

Sjáðu stöðuna í deildinni.