Jóhanna Margrét Sigurðardóttir markahæsti leikmaður Hauka í Olís-deild kvenna var ekki í leikmannahópi Hauka er liðið vann þriggja marka sigur á KA/Þór 27-24 í fyrsta leik liðanna í 6-liða úrslitum um Íslandsmeistaratitilinn.

Liðin mætast aftur á miðvikudagskvöldið fyrir norðan klukkan 18:00. Ástæðan fyrir fjarveru Jóhönnu Margrétar í leiknum á laugardaginn er einföld. Jóhanna fékk höfuðhögg í síðasta leik liðsins gegn Stjörnunni í lokaumferð Olís-deildarinnar sem endaði með 26-26 jafntefli.

Í samtali við mbl.is sagði Jóhanna að hún tæki einn dag í einu og vissi ekki hvort hún yrði leikfær í leiknum á miðvikudaginn.

Eins og fyrr segir var Jóhanna Margrét markahæst í liði Hauka í Olís-deildinni í vetur með 148 mörk en hún gekk í raðir Hauka fyrir tímabilið eftir að hafa spilað í Svíþjóð síðustu ár.

Rætt var um úrslitakeppnina í nýjasta þætti Handkastsins.