Stjarnan og Grótta mætast í kvöld í fyrsta leik í úrslitaeinvígi umspils kvenna um Olís sæti.

Fyrsti leikur í einvíginu er í kvöld kl. 19:00 í Heklu höllinni í Garðabæ. Ljóst er að það er afar áhugavert einvígi framundan. Grótta lenti í 2. sæti í Grill 66 deildinni í vetur á meðan Stjarnan lenti í 7. sæti í Olís deildinni. Sigra þarf 3 leiki til að tryggja sér Olís deildar sæti.

Við heyrðum í Hönnu G. Stefánsdóttir aðalþjálfara Stjörnunnar og fengum viðbrögð hvernig henni litist á einvígið sem framundan er.

"Þetta verður hörku einvígi. Grótta er með mjög spennandi lið, mikið stemmings lið og fer langt á því ásamt því að vera góðar maður á mann. Við áttum góðar rimmur síðastliðin ár og skipst á sigrum. Það er ekkert gefins í þessu og við þurfum að mæta með 100% fókus frá fyrstu mínútu, fastar fyrir varnarlega og fara vel með boltann sóknarlega. Ég vil hvetja alla að mæta á þetta einvígi og búa til geðveika stemmningu því það er ekkert skemmtilegra en að spila fyrir áttunda manninn" sagði Hanna G. Stefánsdóttir.