Sara Katrín Gunnarsdóttir leikmaður Stjörnunnar gengur með barn undir belti og verður þar af leiðandi ekki með Stjörnunni í Olís-deild kvenna þegar deildin fer af stað á ný í september.

Sara Katrín lék ekkert með Stjörnunni í umspilinu um laust sæti í Olís-deildinni á dögunum en þar vann Stjarnan undanúrslitaeinvígið gegn FH 2-0 og vann síðan Gróttu í oddaleik 3-2 eftir að hafa lent 1-2 undir í einvíginu.

Sara Katrín gekk í raðir Stjörnunnar fyrir leiktíðina, hún lék ekkert með liðinu í upphafi tímabils vegna meiðsla. Hlutverk hennar óx hinsvegar mikið þegar leið á tímabilið en hún skoraði 65 mörk í 18 leikjum Stjörnunnar í vetur og var fjórði markahæsti leikmaður liðsins í Olís-deildinni að auki fiskaði hún 19 vítaköst.

Stjarnan endaði í 7.sæti Olís-deildarinnar annað árið í röð en miklar breytingar verða á liðinu fyrir næstu leiktíð.