Línumaðurinn Ásdís Guðmundsdóttir mun ekki leika með Fram á komandi leiktíð í Olís-deild kvenna. Þetta staðfesti Gísli Freyr Valdórsson, formaður handknattleiksdeildar Fram, í samtali við Handkastið.

Ásdís gekk til liðs við Fram fyrir síðustu leiktíð og var hluti af liðinu á nýliðnu tímabili. Á dögunum var hanni veitt háttvísiverðlaun HDSÍ á lokahófi HSÍ fyrir framúrskarandi framkomu og drengilega hegðun innan vallar.

Ásdís var þriðji markahæsti leikmaður Fram á tímabilinu með 100 mörk þar af 18 mörk af vítalínunni.

Samkvæmt Gísla Frey nýtti Ásdís sér uppsagnarákvæði í samningi sínum við félagið sem var í gildi til ársins 2027.

Í kjölfarið hafi forráðamenn Fram átt í viðræðum við leikmanninn um áframhaldandi samstarf, en þær viðræður skiluðu ekki niðurstöðu.