Línumaður KA/Þórs hin 25 ára gamla Anna Þyrí Halldórsdóttir mun ekki spila með KA/Þór á næsta keppnistímabili.

Þetta staðfesti hún í samtali við Handkastið en KA/Þór hélt sæti sínu í Olís-deildinni eftir að hafa komið upp úr Grill66-deildinni fyrir síðustu leiktíð.

Ljóst er að þetta er gríðarleg blóðtaka fyrir norðanliðið enda hefur Anna Þyrí verið að spila stórt hlutverk í liði KA/Þór í mörg ár á báðum endum vallarins.

Hún vann m.a alla titla sem í boði var vorið 2021 með KA/Þór undir stjórn Andra Snæs Stefánssonar. Einnig hefur hún spilað í Evrópukeppni fyrir félagið.

Á næstu dögum birtist stutt viðtal við Önnu Þyrí þar sem hún útskýrir ákvörðun sína.