Örn Þrastarson nýráðinn þjálfari karlaliðs Selfoss gerir ekki ráð fyrir að liðið bæti við sig leikmanni eða leikmönnum áður en Olís-deildin fer af stað.

Þetta staðfesti Örn í samtali við Handkastið.

,,Sverrir Pálsson er hættur og Gunnar Kári fór til baka úr láni til FH. Annað er óbreytt. Svo munu bætast inn í hópinn strákar úr yngri flokka starfinu okkar sem hafa ekki verið í hópnum áður. Við munum ekki sækja neina fleiri að svo stöddu," sagði Örn í samtali við Handkastið er hann var spurður út þær breytingar sem hafa orðið á liðinu í sumar og hvort félagið ætlaði sér að sækja nýja leikmenn.

Aðspurður út það hvort einhverjir fleiri leikmenn myndu yfirgefa liðið sagði Örn.

,,Jónas Karl fer mögulega í flugnám erlendis um áramótin en það er hinsvegar ekki komið á hreint," sagði Örn sem tók við liðinu af Carlos Martin Santos sem var valinn þjálfari ársins hjá Handkastinu á síðustu leiktíð.

Selfoss endaði í 10. sæti deildarinnar á síðustu leiktíð sem nýliðar og það verður spennandi að fylgjast með liðinu takast á við nýtt tímabil undir stjórn nýs þjálfara.