Viggó Kristjánsson, landsliðsmaður Íslands og leikmaður þýska úrvalsdeildarfélagsins HC Erlangen, vinnur nú markvisst að endurkomu sinni eftir hnéaðgerð sem hann gekkst undir fyrir tæpum tveimur mánuðum.

Viggó fór í aðgerð vegna brjóskskemmda í hné og hefur því misst af undirbúningstímabili Erlangen fyrir komandi keppnistímabil. Þrátt fyrir það er hann bjartsýnn á framhaldið.

„Þegar maður sleppur við hlaupa- og styrktaræfingarnar, þá er það ekki svo slæmt,“ sagði Viggó í viðtali við Franken Fernsehen. Hann viðurkennir þó að það sé mun erfiðara að fylgjast með liðsfélögum sínum af hliðarlínunni.

„Þegar æfingaleikirnir hefjast og líka í lok síðasta tímabils þegar ég missti af mörgum leikjum, þá var það virkilega erfitt.“

Þrátt fyrir meiðslin og þá staðreynd að hann muni ganga til liðs við SG Flensburg-Handewitt sumarið 2027 er metnaðurinn enn mikill hjá Íslendingnum.

„Markmið mitt er klárlega að hjálpa HC Erlangen að berjast um sæti meðal tíu efstu liðanna í Bundesligunni,“ segir Viggó.

Johannes Sellin, þjálfari Erlangen, efast ekki um hugarfar íslenska landsliðsmannsins þótt ljóst sé að hann yfirgefi félagið eftir tímabilið 2026/27. „Viggó er þannig leikmaður að hann vill sýna enn betur að hugurinn er algjörlega hjá HC Erlangen á meðan hann er hér,“ sagði Sellin.

Í frétt á handball-world er sagt frá því að gert sé ráð fyrir því að Viggó verði ekki klár í fyrstu tvo leiki Erlangen á tímabilinu í það minnsta, gegn Frisch Auf Göppingen og TSV Hannover-Burgdorf. Þar er þó haft eftir landsliðsmanninum að hann stefni ótrauður á að snúa sem fyrst aftur inn á völlinn og hjálpa liðinu að ná markmiði sínu um að enda meðal tíu bestu liða þýsku Bundesligunnar.