Reynir Þór Stefánsson sem fagnar afmælis í dag átti frábæran leik þegar MT Melsungen lagði HSV Hamburg 35-30 í æfingaleik þýsku úrvalsdeildarliðanna á mánudag.

Í umfjöllun félagsins eftir leikinn var íslenski landsliðsmaðurinn sérstaklega tekinn út fyrir sviga en þar sagði að hann hefði „spilað sig í sviðsljósið“ með frammistöðu sinni. Reynir var markahæstur í liði Melsungen með níu mörk, þar af tvö úr vítaköstum.

MT Melsungen hóf leikinn illa og lenti 4-1 undir á fyrstu mínútunum. Hamburg hélt frumkvæðinu lengi vel og leiddi með fjórum mörkum í hálfleik, 19-15. Reynir var hinsvegar einn helsti drifkraftur gestanna í endurkomunni. Hann skoraði meðal annars þrjú mörk í röð í fyrri hálfleik og minnkaði muninn í 13-11 þegar Hamburg virtist hafa leikinn í sínum höndum.

Í seinni hálfleik tók Melsungen öll völd á vellinum. Varnarleikurinn þéttist og sóknarleikurinn small saman, þar sem Reynir hélt áfram að fara fyrir liði sínu. Melsungen vann síðari hálfleikinn 20-11 og fagnaði að lokum öruggum 35-30 sigri.

Reynir Þór er á leið inn í sitt annað tímabil með MT Melsungen en hann fór á kostum með Fram í Olís-deildinni tímabilið 2024/2025 er hann varð Íslands- og bikarmeistari með liðinu og var allt í öllu í sóknarleik Fram. Hann missti af öllu síðasta undirbúningstímabili vegna veikinda og var því lengi frá keppni.