Línumaðurinn, Ásdís Halla Hjarðar verður frá æfingum með ÍBV næstu tvær til þrjár vikurnar vegna meiðsla í hné. Hún varð fyrir meiðslunum með íslenska landsliðinu í sumar er liðið lék á HM U20 ára í Kína.

Ásdís Halla var ekki orðin nægilega góð í hnénu þegar ÍBV hóf æfingar að nýju eftir sumarfrí. Myndataka hefur nú leitt í ljós áverka á liðbandi í hnénu, eða tognun. Magnús Stefánsson, þjálfari ÍBV, staðfesti stöðuna í samtali við Handkastið og segir að Ásdís Halla verði frá keppni í tvær til þrjár vikur til viðbótar.

Olís-deild kvenna hefst eftir tæpar þrjár vikur og er Ásdís Halla því í kapphlaupi við tímann til þess að vera klár fyrir fyrsta leik ÍBV. ÍBV tekur á móti KA/Þór í 1.umferð Olís-deildarinnar, laugardaginn 5.september.

Ásdís Halla var mikilvægur hluti af ÍBV-liðinu á síðustu leiktíð þegar Eyjakonur fóru alla leið í úrslitaeinvígið um Íslandsmeistaratitilinn. Þar tapaði ÍBV 3-1 gegn Val.

Litlar breytingar hafa orðið á leikmannahópi ÍBV í sumar. Britney Cots gekk í raðir Vals en Andrea Jacobsen kom heim úr atvinnumennsku og gekk til liðs við ÍBV.