Stymmi klippari sendi Skolphreinsun Ásgeirs í höfuðstöðvar Livey í nýjasta uppgjörsþætti Handkastsins. Ástæðan var sú að útsending frá leik FH og Hauka í 4. umferð Olís-deildar karla var tekin úr loftinu í sjónvarpinu hans áður en leiknum lauk.

„Mér finnst þetta erfitt en ég verð að senda þá á vini mína hjá Livey sem voru að taka við handboltanum. Þeir hafa gert þetta vel og tekið þetta í gegn en þeir voru með FH–Hauka í opinni dagskrá á rás 13 á myndlyklinum mínum,“ sagði Stymmi.

Hann sagðist hafa verið með útsendinguna í gangi þegar FH tók leikhlé, sjö sekúndum fyrir leikslok. Þá hefði skyndilega verið skipt yfir í samantekt úr frönsku knattspyrnunni.

„Ég fór allt í einu að horfa á Lille–Brest. Strákar á Livey, handboltaleikur er ekki alltaf jafn langur, það getur ýmislegt gerst. Ég missti af lokasekúndum leiksins þökk sé Livey.“

Klipparinn missti því af þessum loka sekúndum í leiknum.

Sérfræðingurinn velti því fyrir sér hvort útsendingarskiptin hefðu verið liður í markaðssetningu: „Nú vita þeir sem eru ekki með áskrift hvað þeir eru að missa af.“