Evrópska handknattleikssambandið, EHF, hefur prófað nýtt myndavélakerfi við marklínuna með góðum árangri. Myndavélarnar verða notaðar á öllum sex keppnisstöðum EM kvenna í desember og eiga að gefa dómurum mun skýrari mynd af því hvort boltinn hafi farið yfir marklínuna.

Kerfið var prófað á EHF EURO Cup Finals kvenna í Búkarest í lok september.

Hingað til hefur ekki verið hægt að koma marklínumyndavélum fyrir nákvæmlega fyrir ofan sjálfa marklínuna í handboltamörkum. Nú hefur tekist að leysa það með samstarfi EHF, markaframleiðandans BENZ og tæknifyrirtækisins VOGO.

Nýja kerfið verður tekið í notkun á EM kvenna 2026 sem fer fram í Póllandi, Rúmeníu, Tékklandi, Slóvakíu og Tyrklandi dagana 3.–20. desember.

Tvær myndavélar eru í hvoru marki, ein í hvoru efra horninu þar sem stöng og þverslá mætast.

Myndavélarnar eru að fullu felldar inn í málminn og innri viðarbyggingu stanganna. Með þessari staðsetningu eru þær nákvæmlega fyrir ofan marklínuna og gefa beina mynd af henni.

Markmiðið er að útrýma eins og kostur er óvissu og sjónrænu mati þegar skera þarf úr um hvort boltinn hafi farið yfir línuna.

George Bebetsos, yfirmaður dómaramála hjá EHF, segir lausnina marka tímamót.

„Þetta eru tæknileg tímamót sem engin önnur markaíþrótt hefur náð.“